वायुसेवा निगमको बोइङ खरिदको सबै रकम बुझाउन भवन भट्टलाई ४५ दिने म्याद

अर्थ र बाणिज्य

काठमाडौं, १५ मंसिर । नेपाल वायुसेवा निगमले लिलामीमा राखेको बोइङ ७५७ खरिदका लागि भवन भट्टलाई ४५ दिनको म्याद दिएको छ । निगमले गैरआवासीय नेपाली संघ (एनआरएनए) का अध्यक्ष भट्टको कम्पनी बीबी एयरवेजलाई ४५ दिनभित्र जहाज खरिदको लागि सबै रकम बुझाउन भनेको हो ।

बीबी एयरवेजले असोज अन्तिम साता बोइङ खरिदका लागि अग्रिम भुक्तानी बापत एक करोड ५० लाख बुझाएको थियो । तर, लामो समय खरिद सम्झौता गर्न आनाकानी गरेपछि निगमले एक हप्ते म्याद दिँदै सार्वजनिक सूचना निकाल्यो । नियम र एयरवेजबीच गत मंगलबार खरिद सम्झौता भएको छ ।

निगमका प्रवक्ता रबिन्द्र श्रेष्ठले भने, ‘खरिद सम्झौता अनुसार अब ४५ दिन भित्रमा बाँकी रकम बुझाउनु पर्छ ।’ निगमले बीबी एयरवेजलाई १४ लाख ६० हजार अमेरिकी डलर अर्थात् १५ करोड १८ लाख रुपैयाँमा विमान बिक्री गर्न लागेको छ । यसमध्ये १० प्रतिशत अर्थात एक करोड ५० लाख अग्रिम भुक्तानी दिइएको छ । अब बीबी एयरवेजले १३ करोड ६८ लाख रुपैयाँ बुझाउन बाँकी छ ।