भरतपुर महानगरमा यो नै अन्तिम कार्यकाल होः रेनु दाहाल

चितवन । दोश्रो कार्यकालका लागि चितवनको भरतपुर महानगरपालिकाको मेयरमा निर्वाचित भइसकेपछि रेनु दाहालले यो नै आफ्नो अन्तिम कार्यकाल भएको जनाएकी छन् ।

मंगलबार मतपरिणाम सार्वजनिक भएपछि सञ्चारकर्मीसंग प्रतिक्रिया दिदै रेनुले स्थानीय सरकार प्रमुखको रुपमा यो नै आफ्नो अन्तिम कार्यकाल भएको जनाएकी हुन् ।

‘यो मेरो अन्तिम कार्यकाल हो, स्थानीय तहको नेतृत्वको रुपमा अन्तिम पटकका लागि अवसर पाएको छु, एक सेकेन्ड पनि खेर नफालेर म दिलो ज्यानले आफ्नो क्षमताले भ्याएसम्म काम गर्नेछु’, रेनुले भनिन् ।

यस्तै, निर्वाचनमा जित्नु नै आफ्नो कामको अनुमोदन भएको भन्दै उनले ७ हजारको अन्तरले निर्वाचन जित्ने अनुमान गरेको तर भरतपुरवासीले १२ हजार बढी मतले विजयी गराएको जनाइन् ।

उनले आफ्नो दोस्रो कार्यकाल शिक्षा, स्वास्थ्य र पूर्वाधार विकासम केन्द्रित हुने र पहिलो निर्णय महिला र विपन्न लक्षित हुने पनि बताइन् ।

रेनु भारी मतान्तरले विजयी

नेकपा एमालेका विजय सुवेदीलाई १२ हजार बढी मतले पराजित गर्दै गठबन्धनको तर्फबाट रेनु दाहाल भरतपुर महानगरपालिकाको मेयरमा निर्वाचित भएकी हुन् । उनी १२ हजार ४ सय ४९ मतान्तरले विजयी भएकी हुन् ।

प्राप्त विवरणअनुसार दाहालले ५२ हजार ३० मत ल्याउँदा उनका निकटतम प्रतिद्वन्द्वी एमालेका सुवेदीले ३९ हजार ५ सय ८१ मत ल्याए ।

उमपेयरमा पनि सत्तारूढ गठबन्धनबाट नेपाली कांग्रेसका चित्रसेन अधिकारी विजयी भए । अधिकारीले ५२ हजार ८ सय ३ मत ल्याउँदा उनका निकटतम प्रतिद्वन्द्वी राप्रपाकी हिमला गुरूङले ३० हजार ६ सय १२ मत ल्याइन् । हिमलालाई एमालेको समर्थन थियो । मेयर पदका स्वतन्त्र उम्मेदवार जगन्नाथ पौडेलको १४ हजार ७ सय २८ मत आएको छ ।

Comments

• न्युज नेपाल
• भरतपुर महानगरपालिका
• स्थानीय तहको निर्वाचन २०७९