अग्नि सापकोटा र भिजिट भिसा प्रकरणमा प्रचण्डः वाहियात कुप्रचार चलिरहेको छ

Breaking News

- न्यूज नेपाल

विराटनगर । प्रमुख प्रतिपक्षी दल नेकपा माओवादी केन्द्रका अध्यक्ष प्रचण्डले संसद खुलाउनका लागि सत्तारुढ दल कांग्रेस-एमालेसंग भएको सहमति आफ्नो पार्टीका उपाध्यक्ष तथा प्रवक्ता अग्निप्रसाद सापकोटासंग कुनै साइनो नरहेको दाबी गरेका छन् ।

भिजिट भिसा प्रकरणमा गृहमन्त्री रमेश लेखकको राजीनामा र छानविन समितिको माग गर्दै संसद अवरोध गर्दै आएको माओवादी केन्द्रले अमूर्त सहमति गर्दै संसद खुलाएपछि यसबारे विभिन्न आरोप लागिरहे‍का छन् ।

माओवादीले अमूर्त सहमतिको आधारमा संसद खुलाएपछि विराटनगर विमानस्थलमा पत्रकारले उनलाई प्रश्न गरेका थिए । ती प्रश्नको जवाफ दिदै प्रचण्डले वाहियात कुरा भनेका छन् ।

‘वाहियात कुरा मानिसहरूले प्रचार गर्ने गर्‍या छन्, त्यस्तो केही पनि होइन, यो कुरा र अग्नि (सापकोटा) को कुनै साइनो सम्बन्ध छैन।’ , प्रचण्डले अग्नि सापकोटा र भिजिट भिसा प्रकरणबारे सोधेको प्रश्नमा भने ।

उनले भिजिट भिसा प्रकरण छानबिनको मुद्दा नछाडेको समेत दाबी गरेका छन् ।