प्रधानमन्त्रीको भनाई ‘सरकार हाई अलर्टमा’…..

breaking news

- न्यूज नेपाल

काठमाडौं । प्रकृतिक प्रकोप तथा मौसमजन्य विपद्‌को उद्धारका लागि सरकार हाई अलर्टमा रहेको प्रधानमन्त्री केपी शर्मा ओलीले बताएका छन् ।

विपद् व्यवस्थापन विभागलाई हाई अलर्टमा राखेको उनले जनाएका छन् । त्यस्तै, प्रधानमन्त्रीले सशस्त्र प्रहरी बल, नेपाली सेना र नेपाल प्रहरीका स्वयंसेवक र उद्धार उपकरणसहित तैनाथी अवस्थामा रहेको जानकारी गराएका छन् ।

विपद् सम्भावित क्षेत्रमा खटिएका सुरक्षा निकायका सम्पर्क नम्बरहरु सार्वजनिक गरिएकाले सूचना समन्वयका लागि सम्पर्क गर्न अनुरोधसमेत गरेका छन् ।

यस्तै उनले सामाजिक सञ्जालमार्फत् त्रिशूलीलगायत देशका विभिन्न नदीहरूको जलसतह बढेको भन्दै आम नागरिकलाई उच्च सतर्कता अपनाउन आग्रह गरेका छन्।

मनसुन सक्रिय भएसँगै बाढी र पहिरोको जोखिम बढेकाले सबैलाई सुरक्षित रहन उनले अपिल गरेका हुन् ।

भोटेकोशी नदीमा आएको बाढीका कारण रसुवाको चीन सीमाको मितेरी पुल बगाएको छ भने कैयौं सवारीसाधन पनि बगेका छन् । यस्तै नुवाकोटको त्रिशूली नदीको बाढीमा फसेका २ जनाको सेनाको हेलिकप्टरबाट उद्धार गरिएको छ ।

भोटेकोशीको बाढीमा परी अहिलेसम्म ६ जना चिनियाँ नागरिकसहित ३ जना प्रहरीलगायत १८ जना बेपत्ता भएका छन् । उनीहरुको खोजी कार्य जारी छ ।