विराटनगर आगजनी प्रकरणः नेपाली कम्युनिष्ट पार्टीका अन्सारीसहित पाँचजना पक्राउ

पक्राउ पर्नेमा पूर्वमन्त्री मोदीका स्वकीय सचिवका रुपमा कार्यरत अन्सारी पनि

Breaking News

विराटनगर । जेनजी आन्दोलनका क्रममा गत २४ भदौमा विराटनगरस्थित विभिन्न सरकारी कार्यालयमा गरिएको आगजनी तथा तोडफोड घटनामा संलग्न रहेको आरोपमा पाँच जना पक्राउ परेका छन्। पक्राउ परेकामध्ये नेपाली कम्युनिष्ट पार्टीका स्थानीय नेता ताजिम अन्सारी पनि रहेका छन्।

अन्सारी, जो अमनलाल मोदी सामान्य प्रशासन मन्त्री भएको समयमा स्वकीय सचिवका रूपमा कार्यरत थिए, उनी सो घटनामा प्रत्यक्ष संलग्न रहेको प्रहरीको दाबी छ। घटनासम्बन्धी भिडियोसमेत सार्वजनिक भएपछि उनीविरुद्ध अनुसन्धान तीव्र बनाइएको थियो।

मोरङ प्रहरीका अनुसार अन्सारीलाई विराटनगर बजार क्षेत्रबाट पक्राउ गरिएको हो। कटवालले तोडफोड तथा आगजनीमा अन्सारीसहित अन्य व्यक्तिहरूको संलग्नता पुष्टि भएको छ।

पक्राउ पर्ने अन्य व्यक्तिमा राजिव यादव, अरुण साह सोनार, महेश नेपाल र आवाज पौडेल रहेको प्रहरीले जानकारी दिएको छ। आइतबार मात्र रंगेलीबाट थप तीन जनालाई प्रहरीले नियन्त्रणमा लिएको थियो। यसअघि नै मोरङ प्रहरीले सोही घटनामा संलग्न रहेको अभियोगमा २३ जनालाई पक्राउ गरिसकेको छ। प्रहरीले घटनाबारे थप अनुसन्धान जारी राखेको जनाएको छ।