बजेटमा प्रधानमन्त्रीको हस्तक्षेप, अर्थमन्त्रीदेखि बजेट लेखनमा सक्रिय टोली अलमलमा

Breaking News

- न्यूज नेपाल

काठमाडाैं । प्रधानमन्त्री कार्यालयले बजेटबारे सुझाव संकलन गर्न भन्दै छुट्टै वेबसाइट ल्याएपछि अर्थमन्त्रालयका कर्मचारीहरु अलमलमा परेका छन्।

अर्थमन्त्रालयले बजेट लेखनको काम तीब्र गतिमा गरिरहेको बेला प्रधानमन्त्रीको कार्यालयले बजेटबारे सुझाव मागेपछि अर्थमन्त्रालयमा बजेट लेखनमा सक्रिय रहेका टोली अलमलमा देखिएका हुन्।

अर्थमन्त्री डा. स्वर्णिम वाग्लेले बजेट लेखनलाई ऐतिहािक बनाउने दाबी गरिरहेको बेला प्रधानमन्त्री कार्यालयले नै सक्रियता बढाएपछि अलमल देखिएको हो। यतिमात्रै नभई सरकारले बजेट लेखनमा सक्रिय सहसचिवहरुको सरुवा नै गरिदिएपछि कर्मचारीहरु आश्चार्यमा परेको स्रोतको दाबी छ।

न्यूज नेपालसंग एक कर्मचारीले भने, ‘बजेट अर्थमन्त्रालयले प्रधानमन्त्रीको निर्देशनमा लेख्ने हो। अहिले त अर्थमन्त्रालयले गरिरहेको काममा प्रधानमन्त्री कार्यालयले समानान्तर बजेट लेख्न थालेको जस्तो देखिन्छ। यसले शक्ति केन्द्रिकरणमात्रै नभई मन्त्रीहरुको विज्ञता र भूमिकामा पनि प्रश्न उब्जाएको छ। बजेट लेखन चलिरहेको छ। तर, कुन दिन प्रधानमन्त्रीको निर्देशन भन्दै सबै फेरबदल हुने हो टुंगो छैन्।’

आगामी वर्षको बजेट जेठ १५ भित्रै संसदमा पेश गरिसक्नुपर्छ। अहिले अर्थमन्त्रालयले बजेट लेखन तीब्र पारिरहेको छ। यता, प्रधानमन्त्री कार्यालयले पनि सुझाव भन्दै यसरी सक्रियता अघि बढाएपछि अन्योलता र आश्वार्य सिर्जना गरेको बताइन्छ।