एमाले सचिवालय बैठक शनिबार बस्दै

काठमाडौँ । नेकपा एमाले को सचिवालय बैठक शनिबार बस्ने भएको छ। पार्टी अध्यक्ष केपी शर्मा ओली को स्वास्थ्य अवस्थालाई ध्यानमा राख्दै बैठकको स्थान भने अझै तय नभएको पार्टीले जनाएको छ।

पार्टी सचिव भानुभक्त ढकालका अनुसार बैठकको औपचारिक सूचना आइसकेको छैन तर शनिबार बस्ने तयारी भने गरिएको छ। उनले भने, ‘अध्यक्षज्यूको स्वास्थ्य अवस्थालाई ध्यानमा राखेर बैठकको स्थान तय गरिनेछ।’

चुनावपछि अध्यक्ष ओली पहिलो पटक पार्टी बैठकमा सहभागी हुन लागेका हुन्। यसअघि गत चैत १३ गतेको जेनजी आन्दोलनसँग सम्बन्धित घटनापछि उनी पक्राउ परेका थिए भने चैत २६ गते रिहा भएका थिए। त्यसयता स्वास्थ्य समस्याका कारण उनी पार्टी गतिविधिमा नियमित रूपमा फर्किन सकेका छैनन्।

ओली हिरासतमा रहेका बेला पार्टी उपाध्यक्ष रामबहादुर थापा ‘बादल’ लाई कार्यवाहक अध्यक्षको जिम्मेवारी दिइएको थियो। उनको अध्यक्षतामा यसअघि दुई पटक सचिवालय बैठक समेत बसेको थियो।

यसैबीच, एमालेभित्र पछिल्लो समय आन्तरिक शक्ति सन्तुलन र नेतृत्वबारे बहस चुलिँदै गएको देखिन्छ। उपाध्यक्षद्वय विष्णु पौडेल र पृथ्वीसुब्बा गुरुङ, साथै महासचिव शंकर पोखरेल लगायत नेताहरूबीच पार्टी नेतृत्व र आगामी रणनीतिबारे विभिन्न धारणा सार्वजनिक हुँदै आएका छन्।

पार्टीभित्र निर्वाचन समीक्षा समेत अहिलेसम्म औपचारिक रूपमा अघि बढ्न नसकेको बताइँदै आएको छ। सचिवालय बैठक बस्ने तयारीसँगै एमालेभित्र देखिएको आन्तरिक गतिरोधले निकास पाउने अपेक्षा गरिएको छ।

Comments