६ सांसदले समयमा सम्पत्ति विवरण बुझाएनन्, पाँच जना रास्वपाका

काठमाडौँ — प्रतिनिधिसभाका ६ जना सांसदले तोकिएको समयभित्र आफ्नो सम्पत्ति विवरण बुझाउन असफल भएका छन्। संघीय संसद् सचिवालयका अनुसार जेठ १० गतेसम्म सम्पत्ति विवरण बुझाउनुपर्ने म्याद दिइएको भए पनि ६ सांसदले विवरण पेश नगरेका हुन्।

प्रतिनिधिसभा २७५ सदस्यीय छ भने समयमै २५४ सांसदले सम्पत्ति विवरण बुझाएका थिए। बाँकीमध्ये ६ जनाले तोकिएको म्यादभित्र विवरण नबुझाएको संसद् सचिवालयले जनाएको छ।

सम्पत्ति विवरण नबुझाउनेमध्ये ५ जना राष्ट्रिय स्वतन्त्र पार्टी (रास्वपा) का सांसद रहेका छन् भने एक जना नेपाली कम्युनिस्ट पार्टीका सांसद छन्। रास्वपाका आशा झा (मोरङ), कोमल ज्ञवाली (कैलाली), तपेश्वर यादव (सिरहा), प्रमोद कुमार महतो (महोत्तरी) र रबिन महतो (सर्लाही) ले विवरण नबुझाएको बताइएको छ।

नेपाली कम्युनिस्ट पार्टीका सांसद धनबहादुर बुढाले भने म्याद थपका लागि निवेदन दिएका छन्। कानुनी व्यवस्था अनुसार म्याद थप स्वीकृत भए ३० दिनभित्र सम्पत्ति विवरण बुझाउन सकिनेछ।

बाँकी पाँच सांसदले म्याद थपका लागि निवेदन समेत नदिएको संसद् सचिवालयले जनाएको छ।

भ्रष्टाचार निवारण ऐन र अख्तियार दुरुपयोग अनुसन्धान आयोग ऐन अनुसार सार्वजनिक पद धारण गर्ने व्यक्तिले पद ग्रहण गरेको ६० दिनभित्र आफ्नो तथा परिवारको सम्पत्ति विवरण स्रोतसहित बुझाउनुपर्ने व्यवस्था छ।

सम्पत्ति विवरण समयमै नबुझाएमा रु १० हजार जरिवाना लाग्ने र विवरण नबुझाउनेमाथि अख्तियार दुरुपयोग अनुसन्धान आयोगले गैरकानुनी सम्पत्ति आर्जनको आशंकामा अनुसन्धान अघि बढाउन सक्ने कानुनी प्रावधान छ।

Comments