टिकटक स्टार तुल्सा अधिकारी थाइल्याण्डबाट पक्राउ, नेपाल ल्याइयो

Breaking News

- न्यूज नेपाल

काठमाडौं । टिकटकमार्फत चर्चामा आएकी तुल्सा अधिकारीलाई थाइल्याण्डबाट पक्राउ गरी नेपाल ल्याइएको छ। उनीविरुद्ध ठगी तथा सम्पत्ति शुद्धीकरणसम्बन्धी मुद्दा दर्ता भएपछि अन्तर्राष्ट्रिय प्रहरी संगठन (इन्टरपोल) मार्फत रेड नोटिस जारी गरिएको थियो।

ललितपुर प्रहरीका अनुसार अधिकारीलाई नेपाल ल्याएर हाल हिरासतमा राखिएको छ। उनीविरुद्ध ६ करोड ५२ लाख २९ हजार ७५ रुपैयाँ बराबरको ठगी तथा सम्पत्ति शुद्धीकरणको मुद्दा चलिरहेको छ। विदेश फरार भएको पुष्टि भएपछि उनको खोजी तीव्र पारिएको थियो।

प्रहरी वृत्त सातदोबाटोमा गत साउनमै अधिकारीविरुद्ध ठगी तथा आपराधिक विश्वासघातसम्बन्धी उजुरी परेको थियो। अनुसन्धानका क्रममा विभिन्न बैंक खातामा ठूलो रकमको कारोबार देखिएपछि सम्पत्ति शुद्धीकरणतर्फ पनि अनुसन्धान विस्तार गरिएको प्रहरीले जनाएको छ।

यो प्रकरण ‘हाम्रो अटोमोबाइल्स’ का सञ्चालक कुमार चिमोरियाले दिएको जाहेरीबाट सुरु भएको हो। उजुरीपछि अनुसन्धान अघि बढाइएको र अधिकारी फरार भएपछि अन्तर्राष्ट्रिय समन्वयमार्फत पक्राउ प्रक्रिया अगाडि बढाइएको बताइएको छ।

प्रहरीले अब उनलाई अदालतमा उपस्थित गराई थप अनुसन्धान प्रक्रिया अघि बढाउने तयारी गरेको जनाएको छ।