उद्योग वाणिज्य महासंघको निर्वाचन : गोल्छा र प्रधान प्यानल सहित मैदानमा

काठमाडौं । नेपाल उद्योग वाणिज्य महासंघको स्वर्ण जयन्ती चैत २८ गते काठमाडौंमा हुने भएको छ । उद्योगी/व्यवसायीको छाता संगठन ५१ वर्ष पूगेको बेला नयाँ नेतृत्व समेत छानिँदैछ।
त्यसैले अहिले महासंघ नेतृत्वका लागि निर्वाचनको माहोल समेत तात्न थालेको छ। स्वर्ण जयन्ती भन्दा ठूलो चर्चा चुनावी रस्साकस्कीकै छ। स्वर्ण महोत्सवदेखि अध्यक्षको उम्मेदवार निर्विरोध चयन भएपनि बरिष्ठ उपाध्यक्षका लागि अध्यक्षकै जस्तो निर्वाचन हुनेछ।महासंघले केही महिना अघि विशेष साधारणसभाबाट बरिष्ठ उपाध्यक्ष स्वतः अध्यक्ष हुने प्रावधान पारित गरिसकेको छ। त्यसैले अब भवानी राणा निर्विरोध अध्यक्ष बन्नेछिन्।

बरिष्ठ उपाध्यक्ष स्वतः अध्यक्ष बन्ने भए पछि उक्त पदमा भने यसपाली ‘हेभिवेट’ प्रतिस्पर्धा हुनेछ। अहिले एशोसिएट तर्फबाट उपाध्यक्ष रहेका शेखर गोल्छा र जिल्ला नगर उद्योग बाणिज्य संघबाट उपाध्यक्ष निर्वाचित किशोर प्रधान बरिष्ठ उपाध्यक्षको ‘रेस’मा छन्।
प्रधानले ‘होम टाउन’ विराटनगरबाट आइतबार आफ्नो उम्मेद्वारी घोषणा गरि सकेका छन्। उनले आफ्नो प्यानलमा जिल्ला नगर उद्योग बाणिज्य संघका तर्फबाट म्याग्दीका व्यवसायी प्रमोद श्रेष्ठलाई उपाध्यक्षको उम्मेद्वार बनाएका छन्। उनको प्यानलबाट बस्तुगत र एशोसिएट उपाध्यक्षको भने टुंगो लागेको छैन।

स्रोतका अनुसार वस्तुगत उपाध्यक्षमा शंकर पाण्डे वा अञ्जन श्रेष्ठ मध्ये एक जना प्रधानको प्यानलमा हुनेछन्। यो वाहेक उनको प्यानलबाट एसोसिएट उपाध्यक्ष, कोषाध्यक्ष र अन्य केन्द्रीय सदस्यको टुङ्गो भएको छैन।

गोल्छाले पनि यही साता प्यानलसहित उम्मेदवारीको घोषणा गर्न लागेका छन्। उनको प्यानलमा जिल्ला नगर उद्योग बाणिज्य संघका तर्फबाट अहिलेका वस्तुगत उपाध्यक्ष दिनेश श्रेष्ठ उठ्ने निश्चित भएको छ। बरिष्ठ उपाध्यक्षको आकांक्षी भएपनि श्रेष्ठले पटक उपाध्यक्षमै निरन्तरता दिन लागेका हुन्।

गोल्छा समूहबाट एशोसिएट उपाध्यक्षका लागि दुर्इ जना आकांक्षी भएपछि मिलाउन कठिन भइरहेको छ। ज्ञानेन्द्रलाल प्रधान र चन्द्रप्रसाद ढकालले उक्त पदमा आकांक्षा देखाएका हुन्। प्रधान र ढकाललार्इ मिलाउन गोल्छासमुहलार्इ हम्मे परिरहेको स्रोतको भनाइ छ।

गोल्छाले प्रधानलार्इ कोषाध्यक्षमा मनाएर ढकाललार्इ एशोसिएटको उपाध्यक्षमा उठाउन चाहेका छन्। एशोसियट मिलाउन सके चुनाब जित्न सजिलो हुने ठम्यार्इमा गोल्छा समुहको छ। यो समूह बस्तुगत उपाध्यक्षमा भने उमेशलाल श्रेष्ठलार्इ उठाउने टुंगोमा पुगेको छ।

महासंघमा तीन खालका सदस्य छन्। एक जिल्ला तथा नगर उद्योग बाणिज्य संघ, दोस्रो वस्तुगत संघ र तेस्रो एशोसिएट तर्फबाट महासंघमा प्रतिनिधित्व गर्छन्। देशभर १०४ वटा जिल्ला तथा नगर उद्योग बाणिज्य संघ महासंघमा आवद्ध छन्। यो समुहको मत भार ५० प्रतिशत हुन्छ।वस्तुगतमा ९९ वटा सदस्य छन्। उनीहरुको मतभार २० प्रतिशत रहन्छ। वस्तुगत अन्तर्गत नेपाल पश्मिना उद्योग संघ, नेपाल विज्ञापन संघ जस्ता व्यवसाय केन्द्रित संगठन आवद्ध छन्।

एशोसिएटमा भने बिभिन्न उद्योग एवं कम्पनीहरु सदस्य छन्। उनीहरुको संख्या ८५६ र मतभार ३० प्रतिशत रहन्छ।

जिल्लामा राजनैतिक कारणले धेरै भोट बाँडिने गर्छ। प्रधानको प्यानलबाट उपाध्यक्ष उम्मेद्वार बनेका प्रमोद एमाले निकट मानिन्छन्। उनले यसअघि गोल्छा समूहसँग पनि छलफल गरेका थिए। तर, यो समूह दिनेश श्रेष्ठलार्इ उठाउने टुंगोमा पुगेपछि उनी प्रधानतिर गएका हुन्।

Comments