शैक्षिक, धार्मिक महोत्सवमा रु साठी लाख सङ्कलन

अर्थ र बाणिज्य

- रासस

इलाम, ४ चैत । इलामको सूर्योदय नगरपालिकास्थित करफोकमा सञ्चालित शैक्षिक तथा धार्मिक महोत्सवमा रु ६० लाख सहयोग सङ्कलन भएको छ ।

महोत्सवमा दाताले रु १० हजारदेखि तीन लाखसम्म दान गरेका थिए । रु एक करोड सङ्कलन गर्ने उद्देश्यले सुरु गरिएको महोत्सवमा सो बराबरको सहयोग भने सङ्कलन नभएको आयोजकका जीवन नेपालले जानकारी दिनुभयो । विसं २००७ देखि सुरु भएको करफोकलाई पूर्वकै नमुना शैक्षिकस्थल बनाउने उद्देश्यका साथ गत हप्ता सप्ताहव्यापी करफोक शैक्षिक तथा धार्मिक महोत्सव आयोजना गरिएको थियो ।

महोत्सवबाट उठेको रकमबाट अत्याधुनिक भवन, सभाहल, खाजा घर, प्रयोगशाला, सङ्गीत प्रशिक्षण केन्द्र स्टुडियो, बगैँचा, पुस्तकालय, खेलमैदान, आकर्षक कक्षाकोठा निर्माण गरिने क्याम्पस प्रमुख जहरसिंह राईले जानकारी दिनुभयो ।

एकसय एक द्वन्द्वपीडित बालबालिकालाई सहयोग

जिल्ला बालकल्याण समिति, इलामले सशस्त्र द्वन्द्वबाट प्रभावित एकसय एकजना बालबालिकालाई विभिन्न सहयोग गरेको छ । समितिले सञ्चालन गरेको द्वन्द्वबाट प्रभावित बालबालिकाको पुनःस्थापना तथा पुनः एकीकरण परियोजनाअन्तर्गत एक वर्षमा शैक्षिक सहयोग, स्वास्थ्य तथा पोषण सहयोग, जीविकोपार्जन, कानुनी सहयोग, मनोसामाजिक परामर्श सेवा प्रदान गरिएको हो ।

एक वर्षदेखि इलाममा सञ्चालित परियोजनाले पहिलो वर्ष ५३ जना बालबालिकालाई शैक्षिक सहयोगबापत रु तीन लाख छ हजार प्रदान गरेको छ जसमा २८ बालक र २५ बालिका रहेको परियोजना अधिकृत लक्ष्मी कँडेलले जानकारी दिनुभयो ।

त्यसैगरी, २७ पुरुष र ११ महिलालाई आयआर्जन तथा जीविकोपार्जनका लागी रु पाँच लाख २४ हजार पाँचसय, स्वास्थ्य सहयोगबापत चारजनालाई रु ३२ हजार, वैकल्पिक स्याहारका लागि दुई पुरूष र चार महिलालाई रु १५ हजार, जोखिममा परेका पाँच बालबालिकाका लागि रु २१ हजार सहयोग रकम प्रदान गरिएको कँडेलले बताउनुभयो ।

द्वन्द्वपीडित बालबालिकालाई समाजमा पुनःस्थापना गर्नका लागि जिल्लाका दानाबारी, सूर्योदय इलाम र देउमाई नगरपालिकाका ७४ जना बालबालिकालाई मनोविमर्श सेवा प्रदान गरेको परियोजनाले जनाएको छ ।

आगामी २०७४ असारसम्म सञ्चालन हुने परियोजनाका लागि इलाममा विनियोजित रु १७ लाखमध्ये हालसम्म १५ लाख ९३ हजार खर्च भइसकेको परियोजनाले जनाएको छ ।