प्रभु बैंकद्धारा रक्तदान कार्यक्रम सम्पन्न

अर्थ र बाणिज्य

बाग्लुङ । प्रभु बैंक लिमिटेडको बागलुङ्ग बजारस्थित बाग्लुङ शाखाले चैते दशै मेलाको अवसर पारेर रक्तदान कार्यक्रम सम्पन्न गरेको छ । गत बुधवार सम्पन्न रक्तदान कार्यक्रममा बैंकका कर्मचारी सहित बागलुङस्थित अन्य विभिन्न कार्यालयका कर्मचारी, अन्य बैंकका प्रतिनिधि र मेला भर्न आएका सर्वसाधारणहरुले रक्तदान गरेका थिए ।
नेपाल रेडक्रस सोसाईटी र रक्त संचार केन्द्रको सहकार्यमा भएको उक्त रक्तदान कार्यक्रमबाट मानव स्वास्थ्यसँग प्रत्यक्ष सरोकार राख्ने रगतको अभाव हुन नदिन नेपालको बैंकिङ्ग क्षेत्र पनि कटिबद्ध रहेको छ भन्ने सन्देश गएको बैंकको दाबी छ । रक्तसंचार केन्द्र बागलुङमा एकैपटकमा धेरै रगतको संकलन गर्ने क्षमता नभएको कारण जम्मा २७ जना रक्तदाताहरुले रक्तदान गरेको थिए । रक्त संकलन क्षमता अभावका कारण रक्तदान गर्न नपाएका इच्छुक व्यक्तिहरुलाई आवश्यक परेको समयमा रक्तदानको लागि खबर गर्ने गरी गर्न सम्पर्कमा राखिएको बताइएको छ ।
प्रभुले आफ्नो स्थापना कालदेखि नै संस्थागत सामाजिक उत्तरदायित्व अन्तर्गत देशका विभिन्न भागहरुमा भुकम्प पिडीतहरुलाई राहत सामाग्री वितरण, अनाथ र अपाङ्ग विद्यार्थीहरुलाई छात्रवृत्ती, शैक्षिक सामाग्री वितरण, निशुल्क स्वास्थ्य जाँच शिबिर, रक्तदान लगायतका विभिन्न समाजपयोगी क्रियाकलापहरुलाई निरन्तरता दिँदै आईरहेको छ ।