एनसेल यहीँ छ,कर उठाउन समस्या छैन : प्रधानमन्त्री प्रचण्ड

अर्थ र बाणिज्य

काठमाडौं । प्रधानमन्त्री पुष्पकमल दाहाल प्रचण्डले संसद्को सार्वजनिक लेखा समिति पुगेर एनसेल कर प्रकरणमा सरकारको जवाफ प्रस्तुत गरेका छन्।

टेलिकम्युनिकेसन कम्पनी एनसेल टेलियासोनेरा कम्पनीले एक्जियटालाई बिक्री गर्दा बुझाउनुपर्ने पुँजीगत लभकर नबुझाएको र सरकारले त्यसलाई उठाउनुको सट्टा उन्मुक्ति दिने निर्णय भएको भन्दै लेखा समितिले प्रधानमन्त्रीलाई आज समितिमा डाकेको थियो।

प्रधानमन्त्री दाहालले एनसेल विक्री प्रकरणमा ३३ अर्ब लाभकर छुट दिने निर्णय नभएको दाबी गरेका छन् ।

एनसेल यहीँ छ कहीँ गएको छैन,प्रधानमन्त्रीले भने, ‘राज्यले तदारुकता देखाए कर उठाउन सकिन्छ।’

उनले एनसेलले पुँजीगत लाभकर नबुझाउनुको कारणबारे गहिरोसँग बुझिनसकेको भन्दै क्रेता र विक्रेतालाई राखेर छलफल गर्न आफूले चाहेको बताए। ‘मैले एकपटक क्रेता र विक्रेता दुवैलाई राखेर छलफल गरी समुचित निर्णय लिनु आवश्यक ठानेको छु,’ प्रधानमन्त्रीले समितिमा भने, ‘सरकार प्रस्ट छ कर उठाउन सम्झौता गर्दैन।’

‘क्रेता भनिएको एक्जियटा कम्पनीबाट पत्र आएपछि मन्त्रीपरिषद्ले सामान्य छलफल गरेको मात्र हो, ‘प्रधानमन्त्रीले यसअघि भएको मन्त्रिपरषद् निर्णय सच्याउँदै भने, ‘आवश्यक कारवाही गर्नु भनेको हो कुनै निर्णय भएको छैन।’

समितिमा यसअघि अर्थमन्त्री कृष्णबहादुर महरालाई डाकेको थियो। अर्थमन्त्री महराको जवाफ चित्त बुझ्दो नभएको भन्दै समितिले प्रधानमन्त्रीलाई डाक्ने निर्णय गरेको थियो।

Comments

प्रकाशित मिति : 2017-04-09

एनसेल यहीँ छ,कर उठाउन समस्या छैन : प्रधानमन्त्री प्रचण्ड

Comments

अरु समाचार