तरकारी खेती वृद्धि गर्न मोरङमा ब्लक कार्यक्रम सुरु,नबिकेको तरकारी पनि प्रशोधन गरिने

अर्थ र बाणिज्य

विराटनगर । विराटनगरमा तरकारीको ७० प्रतिशत माग धानिरहेको कटहरी गाउँमा ब्लक कार्यक्रम सुरु गरिएको छ ।

जिल्ला कृषि विकास कार्यालय मोरङले कटहरीसहित छेउको सिसबनी जहदा गाउँसमेतमा ब्लक कार्यक्रम सुरु गरेको हो । विराटनगर शहरसित पूर्वदक्षिणमा जोडिएको कटहरी पछिल्लो पुनःसंरचनामा उपमहानगरपालिकाभित्र परेको छ । तरकारी उत्पादनका लागि कटहरी निकै उर्वर क्षेत्र मानिन्छ । हाल यहाँ दुई हजार बिघाभन्दा बढी क्षेत्रफलमा तरकारी खेती भइरहेको छ ।

प्रधानमन्त्री कृषि आधुनिकीकरण परियोजनाअन्तर्गत उत्पादन र उत्पादकत्व बढाउँदै हरियो तरकारीमा आत्मनिर्भर बनाउने उद्देश्यले ब्लक कार्यक्रम लागु गरिएको जिल्ला कृषि प्रमुख मनोजकुमार यादवले बताए । ब्लक कार्यक्रमअन्तर्गत कम्तीमा पनि एक सय हेक्टरमा तरकारी खेती गर्नु पर्नेछ । कार्यक्रम लागु भएपछि कार्यालयले बीउ, बेर्ना, मल, सिँचाइ, बजार व्यवस्थापनलगायतका सहयोग उपलब्ध गराउनेछ । तर यसका लागि ब्लक सञ्चालक समितिको प्रस्ताव आवश्यक पर्छ ।

यस्तो सञ्चालक समिति स्थानीय किसानकै सहभागिता र संलग्नतामा निर्माण गरिने हुँदा किसानका समस्या र आवश्यकता गाउँमै पूरा हुने विश्वास स्थानीय कृषक मनोजकुमार सिंहले व्यक्त गरे । गाउँमा ५ सय हेक्टर भन्दा बढी क्षेत्रफलमा तरकारी खेती विस्तार गरेमा जोनका रूपमा समेत विस्तार गर्न सकिने प्रमुख यादवले जानकारी दिए ।

ब्लक कार्यक्रम सुरु भएसँगै आफूमा किसानमा उत्साह छाएको प्रतिक्रिया किसानहरूले प्रकट गरेका छन् । यसबाट कृषि उपजको विक्रीवितरणको समस्या समाधान हुने र अब बिचौलियालाई तरकारी बेच्नु नपर्ने विश्वास गरिएको छ । सस्तो मूल्यमा बिचौलियालाई तरकारी बेच्नुपर्दा किसानले सोचेअनुसारको लाभ लिन नपाइरहेको अवस्था छ ।