श्री एयरलाइन्सले अन्ततः प्रमाणित उडान (प्रुभिङ फ्लाईट) को अनुमति पायो

अर्थ र बाणिज्य

काठमाडौं, १६ साउन । निजी क्षेत्रको हवाई सेवा प्रदायक कम्पनी श्री एयरलाइन्सले आज (सोमबार) देखि प्रमाणित उडान गराउने भएको छ । नागरिक उड्डयन प्राधिकरणले उडान अनुमति प्रमाणपत्र (एओसी) जारी गर्नुभन्दा पहिले अनिवार्य रुपमा प्रमाणित उडान (प्रुभिङ फ्लाईट) गराउने नियम अनुसार श्री एयरलाइन्सले अनुमति पाएको हो ।

प्राधिकरणले सोमबारको लागि प्रुभिङ उडानको अनुमति दिएको हो । प्रुभिङ उडान पछि उद्घाटन उडान गरेलगत्यै प्राधिकरणले एओसी जारी गर्नेछ । प्रुभिङ फ्लाईटमा प्राधिकरणको टोली, पाइलटहरु लगायत इन्जिनियरहरु सहभागि हुने छन् ।

प्राविधिकहरुले उडानको क्रममा जहाजको सवै परिक्षण गर्नेछन् । सोही इन्जिनियर तथा पाइलटले दिने सुझाव तथा प्रतिक्रियाको आधारमा एओसी प्राधिकरणले जारी गर्नेछ । काठमाडौं(विराटनगर रुटमा प्रुभिङ फ्लाइट हुनसक्ने एयरलाइन्सका बजार प्रवन्धक अनिल मानन्धरले जानकारी दिए ।

तीनवटा विमानले भद्रपुर, विराटनगर, भैरहवा, नेपालगन्ज, धनगढी रूटमा नियमित उडान र काठमाडौंबाट नै माउन्टेन फ्लाइट पनि गर्ने योजना बनाएको छ । श्री एयरलाइन्सका तीन वटा जहाज तीन महिना देखि उडान अनुमति नपाउँदा २० लाख भन्दा बढी प्राधिकरणलाई पार्किङ शुल्क बुझाइ सकेको एयरलाइन्सले जनाएको छ ।

आन्तरिक उडानका लागि भन्दै दुई अर्बभन्दा बढीको लगानीमा एयरलाइन्सले तीनवटा जहाज नेपाल ल्याएको थियो । अनुमति पाउन नसक्दा एयरलाइन्सका दुईवटा जहाज काठमाडौं र एउटा जहाज नेपालगन्ज विमानस्थलको पार्किङमा थन्किएका छन् ।