एनआइसीको स्वीफ्ट ह्याकपछि राष्ट्र बैंकले सबै आइटी प्रमुखलाई डाक्यो

अर्थ र बाणिज्य

काठमाडौं, ६ कात्तिक । नेपाल राष्ट्र बैंकले सबै बैंकका आइटी प्रमुखसँग छलफल गरेको छ । एनआइसी एसिया बैंकको स्विफ्ट ह्याक भएपछि नेपाल राष्ट्र बैंकले सोमबार सबै बैंकका सुचना प्रविधि विभागका प्रमुखसँग छलफल गरेको हो । राष्ट्र बैंकका अधिकारीले प्रविधिक सुरक्षा र तयारीका बारेमा बुझ्न उनीहरुसँग छलफल गरेको हो ।

यता बैंकर्स संघले पनि एकदुई दिनमै आफ्ना सदस्य बैंकहरुसँग छलफल गर्ने भएको छ। हली तिहारका दिन ह्याक भएको सुचना आएपछि संघले सबै सदस्य बैंकलाई तत्कालै जानकारी गराएर उच्च सुरक्षा सतर्कता अपनाउन भनेको थियो। ‘एनआइसीको केसपछि हामी सबै बैंकहरु अहिले निक्कै चनाखो भएर स्विफ्ट कारोबार गरिरहेका छौ’ संघका अध्यक्ष अनिल शाहले भने, ‘प्राविधिक र ब्यक्तिगत सुरक्षामा विशेष जोड दिएका छौं।’

हली तिहारको दिन एनआइसी एसियाको स्विफ्ट ह्याक भएपछि संघले तत्कालै सबै बैंकलाई खबर गरेर प्रणाली जाँच गर्न भनेको थियो। बिदाका दिन सबै बैंकले आवश्यक जाँच गरेको उनले जानकारी दिए। ‘अहिले विशेष निगरानी नै बढाएका छौ’ उनले भने, ‘आन्तरिक प्रकृयादेखि पासवर्ड परिवर्तनसम्म गरेका छौं। वाहिर कसैले केही गरिरहेको छ कि भनेर सुरक्षामा पनि ध्यान बढाएका छौं।’