समानुपातिक रूपमा सुन नदिए आन्दोलन गर्छौँ: मञ्चका अध्यक्ष लकान्द्री

अर्थ र बाणिज्य

काठमाडौँ । उद्योग वाणिज्य तथा आपूर्ति मन्त्रालयले मंसिरसम्म नियमित दैनिक २५ केजीका दरले सुन ल्याउन दिनेगरी राष्ट्र बैंकलाई स्वीकृत दिएको छ । राष्ट्र बैंकले सर्कुलर जारी गरेपछि बैंकहरूले दैनिक २५ केजीका दरले सुन ल्याउन मन्त्रालयले राष्ट्र बैंक मार्फत् स्वीकृती दिएको हो ।

राष्ट्र बैंकले चाडपर्वका बेला दैनिक ३० केजीसम्म सुनको आयात गर्न प्रस्ताव गरेको थियो । तर मन्त्रालयले भने २५ केजीसम्म सुन ल्याउन स्वीकृती दियो । चाडपर्वका बेला बीचबीचमा २५ केजीसम्म आयात गर्न दिइएकोमा अब असोजदेखि मंसिरसम्मको अवधि कायम गरेर सहजता दिलाइएको मन्त्रालयको दाबी छ ।

सुनको अभाव भएको भन्दै सुनचाँदी व्यवसायीहरूले भने दैनिक ३५ केजी कोटा कायम गर्नुपर्ने माग गर्दै आएका छन् ।
२५ केजी सुन समानुपातिक ढंगमा वितरण नभई दुई महासंघ (नेपाल रत्न आभूषण र सुनचाँदी व्यवसायी महासंघ) ले यसका सीमित सदस्यहरूलाई पालन–पोषण गर्न आएको नेपाल राष्ट्रिय सुनचाँदी मञ्चका अध्यक्ष गणेश लकान्द्रीले आरोप लगाएका छन् । यो बढेको कोटामा नेपाल राष्ट्रिय सुनचाँदी व्यवसायी मञ्चलाई समानुपातिक रूपमा नछुट्याए कडा संघर्षमा उत्रने समेत अध्यक्ष लकान्द्रीले चेतावनी दिए ।

‘सुनचाँदी क्षेत्रका सीमित व्यक्तिहरूको पहुँचका भरमा सुनचाँदी व्यवसाय अब रहँदैन । साना व्यवसायीले पनि बस्ने र बाँच्ने अधिकार पाउनुपर्छ । यो २५ केजी कोटा पनि पारदर्शी पनि हुँदैन । यसमा पनि दुई महासंघले समानुपातिक ढंगले बाँड्छन जस्तो मलाई लागेको छैन मञ्चका अध्यक्ष लकान्दीले भने,‘साँच्चै भन्नुपर्दा एसोसियट सदस्यहरू खारेज गर्नुपर्छ र छाता संगठनहरूले सजह रूपमा सुन पाउनुपर्छ ।’