घट्यो पेट्रोल, डिजेल र मट्टीतेलको मूल्य

काठमाडौं  । नेपाल आयल निगमले पेट्रोल, डिजेल र मट्टितेलको खुद्रा बिक्री मूल्य दुई–दुई रुपैयाँ घटाएको छ । बुधबार राती १२ बजेदेखि लागू हुनेगरी मूल्य समायोजन भएको निगमले जनाएको छ ।

समायोजित मूल्यअनुसार अब काठमाडौंमा प्रतिलिटर पेट्रोलको १ सय ८ रुपैयाँ पर्नेछ भने डिजेल र मट्टितेलको ९६ रुपैयाँ मूल्य तोकिएको छ । तर, खाना पकाउने ग्यास र हवाई इन्धनको मूल्यमा भने कुनै हेरफेर नभएको निगमले प्रस्ट पारेको छ ।

अन्तर्राष्ट्रिय बजारमा पेट्रोलियम पदार्थको मूल्यमा कमी आएपछि स्वचालित मूल्य प्रणालीअनुसार मूल्य घटाई समायोजन गरेको निगमले बताएको छ । यस्तै, अमेरिकी डलरसँग नेपालको मुद्रा केही बलियो भएकोले पनि मूल्य घटेको निगमका प्रवक्ता वीरेन्द्र गोइतले बताए ।

भारतमा भन्दा नेपालमा सस्तो 

निगमका अनुसार समायोजनपछि भारतको रक्सौलमा भन्दा नेपालको वीरगन्ज सीमामा पेट्रोल प्रतिलिटर १० रुपैयाँ ४१ पैसा र डिजेल प्रतिलिटर १२ रुपैयाँ ३८ पैसा सस्तो पर्नेछ ।

चालु आर्थिक वर्षमा केही महिनापहिले अन्तर्राष्ट्रिय बजारमा पेट्रोलियम पदार्थको मूल्य उच्चतम विन्दुमा पुगी निगमलाई अत्यधिक घाटा भएको थियो । तर, पछिल्लोे १५ दिनमा भने निगमलाई नाफा भएको छ ।

पछिल्लो नाफा मिलाउँदासमेत निगमलाई अझै करिब २ अर्ब ३७ करोड घाटा रहेको निगमले बताएको छ ।

बिहीबारदेखि लागू हुने नयाँ मूल्य समायोजनपछि निगमलाई पेट्रोल, डिजेल, मट्टितेल र हवाई इन्धनमा नाफा छ । तर, खाना पकाउने एलपी ग्याँसमा अझै प्रतिसिलिन्डर ८० रुपैयाँ ६९ पैसा घाटा रहेको निगमका प्रवक्ता गोइतले जानकारी दिए ।

Comments