डा.श्रेष्ठद्वारा डेढ लाखभन्दा बढीको आर्थिक सहयोग

गुल्मी, १९ फागुन । गुल्मीको एक विद्यालयलाई एकै व्यक्तिबाट डेढ लाखभन्दा बढीको आर्थिक सहयोग प्राप्त भएको छ ।

बुटवलमा बसोबास गदै आउनुभएका डा प्रायश्चित श्रेष्ठले गुल्मीको जोहाङ–५ मा रहेको ज्ञानोदय निम्नमाविका लागि रु एक लाख ५५ हजार ५५५ प्रदान गर्नुभएको हो । दोलखा जिल्ला निवासी डा श्रेष्ठ लुम्बिनी अञ्चल अस्पतालका निवर्तमान अध्यक्षसमेत हुनुहुन्थ्यो ।

उक्त रकम श्रेष्ठले विद्यालयको स्वर्ण महोत्सवका अवसरमा प्रदान गर्नुभएको विद्यालय व्यवस्थापन समितिका अध्यक्ष पारिश्वर ढकालले जानकारी दिनुभयो ।

वरिष्ठ चन्दादाता डा श्रेष्ठलाई विद्यालयले स्वर्ण महोत्सवका अवसरमा प्रमुख अतिथि नेपाली काँगे्रसका केन्द्रीय एवम् गुल्मी क्षेत्र नं २ का सांसद चन्द्र भण्डारीले दोसल्ला र सम्मानपत्रले सम्मान गर्नुभएको थियो ।

त्यस्तै पाल्पाली समाज युएई समाजले विद्यालयमा अक्षयकोष स्थापनाका लागि रु पाँच लाख रकम हस्तान्तरण गरेको छ ।

गरिब तथा जेहेन्दार विद्यार्थीको पठनपाठनमा सहयोग पुगोस् भन्ने उद्देश्यले जिल्लाका विभिन्न विद्यालयमा सो रकम अक्षयकोष स्थापनाका लागि हस्तान्तरण गरेको छ । समाजले एक गाविस एक विद्यालयमा अक्षयकोष स्थापना गर्ने अभियानको दोस्रो चरणमा २० विद्यालयका लागि रु २५ हजारका दरले अक्षयकोष रकम हस्तान्तरण गरेको हो ।

आर्थिक अवस्था कमजोर भएका परिवारका बालबालिकाको शैक्षिक विकासमा टेवा पु¥याउन जिल्लाका ६० गाविसका ६० विद्यालयमा अक्षयकोष स्थापना गर्ने लक्ष्यका साथ समाज अगाडि बढेको महासचिव वेदप्रसाद अर्यालले बताउनुभयो । उहाँका अनुसार अहिलेसम्म २० गाविसका विद्यालयमा पुगेर अक्षयकोष रकम हस्तान्तरण गरिसकिएको छ ।

तीन चरणमा पूरा हुने गरी अक्षयकोष स्थापना अभियानमा प्रतिविद्यालय रु २५ हजारका दरले ६० विद्यालयमा १५ लाखको कोष स्थापना गर्ने समाजका खुमबहादुर आलेले बताउनुभयो ।

Comments