प्रभु, सिद्धार्थ र नेपाल इन्भेष्टमेन्ट बैंकलाई क्लियरिङ अनुमति

अर्थ र बाणिज्य

काठमाडौं । नेपाल स्टक एक्सचेन्ज ‘नेप्से’ले थप तीन बाणिज्य बैंकलार्इ क्लियरिङ अनुमति दिने भएको छ। नेप्सेको मापदण्ड र मूल्याङ्कन तालिका अनुसार सिडिएस एण्ड क्लियरिङ लिमिटेड ‘सिडिएससी’ले नेपाल इन्भेष्टमेन्ट बैंक, सिद्धार्थ बैंक र प्रभु बैंकलार्इ क्लियरिङ बैंकका रुपमा छनौट गरेको हो।
क्लियरिङ बैंककालागि प्राप्त आशयपत्रहरुको मूल्यांकन गरी नेप्सेको स्वीकृत मापदण्ड र मूल्यांकन तालिका अनुसार सिडिएससीले यी तीन बैंकलार्इ छनौट गरेको जनाइएको छ।

क्लियरिङ बैंकको रुपमा काम गर्न सानिमा बैंक, बैंक अफ काठमाडौं, नविल बैंक, सिटिजन्स बैंक इन्टरनेशनल, प्रभु बैंक, एनआइसी एसिया बैंक, नेपाल इन्भेष्टमेन्ट बैंक, सिद्धार्थ बैंक, स्ट्यान्डर्ड चार्टर्ड बैंक नेपाल, सनराइज बैंक, एभरेष्ट बैंक र एनबी बैंकले आशयपत्र पेश गरेका थिए।

प्राप्त आशयपत्रहरुको मूल्यांकन गरी उच्च अंक प्राप्त गर्ने बैंकहरुलार्इ सिडिएससीको मूल्यांकन समितिले सिफारिस गरेको जनाइएको छ।

तीन बैंक थपिएपछि क्लियरिङ बैंकको संख्या चार पुग्नेछ। अहिले ग्लोबल आईएमइ बैंक एक्लैले क्लियरिङ बैंकको काम गरि रहेको थियो। क्लियरिङ बैंक थपिएपछि राफसाफ थप तिब्र गतिमा हुने अपेक्षा सरोकारवालाले गरेका छन्।