शंकास्पद बैकिङ्ग कारोवार बढेपछि अनुसन्धान सुरु

अर्थ र बाणिज्य

काठमाडौं । बैकिङ्ग च्यानलबाटै नगद कारोबार हुँदा अवैध क्रियाकलाप बढेको आशंकामा राष्ट्र बैंकले आगामी साउन १ गतेदेखि १० लाख भन्दा बढीको चेक साट्न नपाइने नियम लागू गरेको छ ।

भारतमा कालोधनमाथिको कारवाही स्वरुप ठूला नोटमाथिको प्रतिबन्ध लगाइएको केही समयपछि नेपालमा शंकास्पद धनमाथिको कडाई सुरु गरिएको हो । यसअघि भारतमा पनि नोटवन्दी गरिनुअघि यस्तै प्रक्रिया अवलम्बन गरिएको थियो।

पछिल्लो समय बैंकमार्फत् भइरहेको शंकास्पद कारोवारमाथि राष्ट्र बैंकको वित्तिय सूचना जानकारी र्इकाइले सुक्ष्म निरीक्षण गरिरहेको छ । हरेक दिन बैंक तथा वित्तिय संस्थाले १० लाख भन्दा बढीको कारोवारको स्रोत र कारोवार गर्नेको विवरण सो इकाइमा पठाउनुपर्ने र सेयर कारोवारमा हुने १० लाखभन्दा बढीको कारोवारको विवरण पनि दलाल कम्पनीहरुले पठाउनुपर्ने नियम छ ।

यिनै कारोवारमध्येबाट शंकास्पद कारोवारको छनोट गरी अनुसन्धान सुरुगरिएको छ। जसमध्ये हाल करिब ४ हजार यस्ता शँकास्पद कारोवारको विवरणमाथि विभिन्न निकायले अनुसन्धान गरिरहेका छन् ।
पछिल्लो समयमा सेयर कारोवारमा अवैध पूँजी भित्रिएका आशंकामा विभिन्न अन्तर्राष्ट्रिय संस्थाहरुले अनुसन्धान गर्न आग्रह गरेको थियो । सोहीअनुसार धितोपत्र बोर्डले यस्तो अध्ययनकालागि समितिसमेत बनाएको थियो । तर,सेयर लगानीकर्ताहरुको चर्को विरोधका कारण समिति भङ्ग गरिएको थियो