मासुको आपूर्ति बढाउन पाडापालन कार्यक्रम

अर्थ र बाणिज्य

बनेपा, ४ वैशाख । काभ्रेपलाञ्चोकमा मासुको आपूर्ति बढाउन पाडापालन कार्यक्रमका लागि कृषकलाई अनुदान उपलब्ध गराइएको छ ।

जिल्लाको साविकको भुग्देउ गाविसमा रु दुई लाख दुई कृषकलाई उपलब्ध गराउन सम्झौता भएको जिल्ला पशुसेवा कार्यालयका पशु चिकित्सक मणि सापकोटाले जानकारी दिनुभयो । अनुदानप्राप्त कृषकले अनिवार्य कम्तीमा २५ वटा पाडा पालेको हुनुपर्छ ।

साना दूधे पाडा नास नहोउन र पाडाबाट दिगो रुपमा मासु उपलब्ध होस् भन्ने उद्देश्यले अनुदानको व्यवस्था गरिएको हो, उहाँले भन्नुभयो । सरकारले मासुको मागअनुसार आपूर्ति पनि पूरा गर्ने उद्देश्यले पाडापालन कार्यक्रमलाई प्राथमिकतामा राखेकोे पशु चिकित्सक सापकोटाले उल्लेख गर्नुभयो ।

त्यस्तै जिल्लाको साविकको नार्गेगर्गचे गाविसमा दिनेश लामाले सञ्चालन गरेको तामाकोसी अर्गानिक फार्ममा ५० वटा पाडापालन गरिएको छ । सो फार्मलाई पटक पटक गरेर रु १२ लाखसम्म अनुदान उपलब्ध गराइएको सो कार्यालयले जनाएको छ ।

काभ्रेपलाञ्चोकमा तीन वर्षदेखि पाडापालन कार्यक्रम सञ्चालन हुँदै आएको छ । जिल्लामा कुल एक लाख २० हजार भैँसी रहेका र तीनबाट दूधको उत्पादनमा ६० प्रतिशत योगदान रहेको बताइएको छ । रासस