सरकारको नीतिले विदेशी मदिराको आयात घट्यो, नेपाली मदिराको बिक्री बढ्यो

अर्थ र बाणिज्य

काठमाडौं, २८ बैशाख । नेपालमा पछिल्लो समय विदेशी मदिराको आयात घट्न थालेको छ । सरकारले स्वदेशी मदिरालाई प्रोत्साहित तथा स्वदेशमै गुणस्तरीय मदिरा उत्पादन गर्न थालेपछि विदेशी मदिराको आयात घट्न थालेको हो ।

नेपाली उद्योगले विश्वस्तरीय माल्ट प्रयोग गरेर मदिरा उत्पादन थालेपछि विदेशी मदिरा आयात घटेको हो । चालु आर्थिक वर्षको नौ महिनामा ८३ लाख लिटर मदिराजन्य वस्तु आयात भएको थियो जबकी अघिल्लो वर्षभरी १ करोड २० लाख लिटर मदिराजन्य वस्तु आयात भएको थियो । स्वदेशी मदिराको हिस्सा बढ्दै गएको भन्सार विभागको तथ्यांकले समेत पुष्टी भएको छ ।

यो वर्षको नौ महिना अवधिमा १ अर्ब ४१ करोड रुपैयाँ बराबरको मदिराका लागि आवश्यक कच्चा पदार्थ नेपाल भित्रिएको भन्सार
विभागले जनाएको छ । गत वर्षभरी ४० करोड रुपैयाँ बराबरको मात्रै कच्चा पदार्थ नेपाल भित्रिएको थियो । अहिले स्वदेशी मदिरा उद्योगले विदेशी सरह ह्विस्की र अन्य मदिरा उत्पादन हुन थालेका छन् ।

मुलुकभित्रका तारे र राम्रा रेष्टुरेन्टमा स्वदेशी मदिरा नै राख्न थालेका छन् । विदेशी मदिरामा राजश्वको दरमा भारी वृद्धि भएपछि मूल्य आकासिएको छ जसले विदेशी मदिराको बिक्री घटेको छ।