महालेखाले कमिसनमा भ्याट लगाउन भनेपछि शेयर ब्रोकरले कारोबार बन्द गरे

अर्थ र बाणिज्य

काठमाडौं, १५ असार । सेयर कारेबार अनिश्चितकाललाई बन्द गरिएको छ । शेयर ब्रोकरको कमिसनमा पनि मूल्य अभिबृद्धि कर (भ्याट) लगाउन सरकारले पत्र काटेपछि त्यसको बिरोधमा ब्रोकरहरुले विहीबारको सेयर कारोबार बन्द गरेका हुन् ।

महालेखा परीक्षकको कार्यालयले ब्रोकरको कमिसनमा पनि भ्याट लगाउनुपर्ने भन्दै अर्थमन्त्रालयलाई बेरुजु लेखेपछि सरकारले आर्थिक बर्ष २०६९र७० देखि अहिलेसम्मको भ्याटको रकम बुझाउन ब्रोकरलाई पत्र लेखेको छ।

आन्तरिक राजस्व कार्यालयले दुई ब्रोकर कम्पनीलाई पुरानो भ्याट, जरिवाना र त्यसमा लाग्ने ब्याज भुक्तानी गर्न पत्र लेखेको छ। बाँकी ब्रोकरलाई फूल अडिटका लागि पत्र लेखेको छ। कार्यालयले सबै ब्रोकर कम्पनीहरुलाई भ्याटमा दर्ता हुनसमेत निर्देशन दिएको छ।

बजेटमा ब्यवस्थै नगरी पश्चगामी कर लगाएको भन्दै ब्रोकरहरुले त्यसको बिरोधमा कारोबार बन्द गर्ने निर्णय गरेका हुन्। ब्रोकरहरुले कमिसनमा भ्याट लाउनु हुँदैन भनेर लबिङसमेत गर्दै आएका थिए। ब्रोकरले उठाउने पैसामा नेपाल स्टक एक्सचेञ्ज र धितोपत्र वोर्डको समेत कमिसन हुने भन्दै त्यसमा भ्याट लाउन नहुने उनीहरुको तर्क छ।