आजदेखि आयात निर्यातकर्ताका लागि भन्सारमा एक्जिम कोड अनिवार्य

अर्थ र बाणिज्य

काठमाडौं, १ साउन । आजदेखि भन्सारमा एक्जिम कोड अनिवार्य गरिएको छ । आयात निर्यातमा संलग्न व्यापारीहरुको लागि आज (आइतबार) देखि निकासीरपैठारीकर्ता संकेत (एक्जिम कोड) अनिवार्य गरिएको हो । अहिलेसम्म भन्सार विभागबाट २ हजार ७ सय ८३ ब्यवसायीले संकेत नम्बर लिएका छन् ।

नयाँ आर्थिक वर्ष सुरु भएसँगै न्युनतम् ५० हजारसम्मको वस्तु तथा सेवा आयात गर्ने तथा ५ लाख बराबरको निर्यात गर्नेले यो कोड अनिवार्य लिनुपर्ने छ । बजेट भाषणमार्फत नै सरकारले एक्जिम कोड लागू गर्ने घोषणा गरेको थियो ।

यस्तो कोड नम्बर नलिएकाले अब तोकिएको भन्दा बढी रकमको मालसमान आयात–निर्यात गर्न पाउने छैनन् । यसले आयात निर्यातमा संलग्नहरुलाई नियमन गर्न सहज हुने भन्सार विभागका प्रवक्ता कुलराज ज्ञवालीले जानकारी दिए ।अब व्यापारीको पहिचानसमेत रहने यस्तो कोडमा व्यापारसम्बद्ध कागजातहरु विद्युतीय प्रणालीमा आवद्ध हुनेछन् ।

अब सबै आयात–निर्यातकर्ताको सबै विवरण विभागसँग हुने भएकाले यसले वैदेशिक ब्यापारलाई थप ब्यवस्थित गर्ने विश्वास गरिएको छ ।हाल नेपालमा हुने कुल वस्तु व्यापारमा भारतको हिस्सा ६१ प्रतिशत र चीनको हिस्सा १४ प्रतिशत रहेको छ ।