प्रभु इन्स्योरेन्सले बीमा समितिमा ‘क्यापिटल प्लान’ बुझायो, २५% बोनस र ४५ % हकप्रद दिने

अर्थ र बाणिज्य

काठमाडौं, १५ साउन । प्रभु इन्स्योरेन्सले बीमा समितिमा ‘क्यापिटल प्लान’ बुझाएको छ। बीमा समितिमा बुझाएको विवरणअनुसार कम्पनीले आर्थिक बर्ष २०७४/७५ मा २५ प्रतिशत बोनस र बोनसपछि ४५ प्रतिशत हकप्रद जारी गर्ने भएको छ । बोनस र हकप्रदसँगै कम्पनीको चुक्ता पूँजी एक अर्ब ४८ करोड रुपैयाँ पुग्नेछ । कम्पनीले आर्थिक बर्ष २०७३/७४ मा आफ्नो चुक्ता पूँजी ३८ करोड ५० लाखको ५० प्रतिशत हकप्रद जारी गरिसकेको छ । हकप्रद जारी गरेसँगै गत आर्थिक बर्षमा कम्पनीको चुक्ता पूँजी ५७ करोड ७५ लाख रुपैयाँ पुगेको छ।

कम्पनीले आर्थिक बर्षमा चुक्ता पूँजी ५७ करोड ७५ लाखको २० प्रतिशत बोनस शेयरबाट हुन आउने ११ करोड ५५ लाख रुपैयाँ सहित ६९ करोड ३० लाख रुपैयाँ पुग्ने छ । कम्पनीले बोनस शेयर जारी गरेपछि ३१ करोड १८ लाख रुपैयाँ हकप्रद जारी गर्ने भएको छ।

हकप्रद जारी गरेसँगै कम्पनीले बीमा समितिले निर्देशन गरेको एक अर्ब रुपैयाँ तोकिएको समयमै पूरा गर्ने प्रभु इन्स्योरेन्सका प्रमुख कार्यकारी अधिकृत सञ्चित बज्राचार्यले जानकारी दिए । कम्पनीलार्इ चुक्ता पूँजी पुयाउन आर्थिक बर्ष २०७३/७४ बाटै सकिने बताउँदै चालु आर्थिक बर्षको नाफाले आगामी बर्षमा थप बोनस दिन सकिने बज्राचार्यले बताए । कम्पनीले क्यापिटल प्लान बुझाएको भए पनि साधारणसभाबाट पारित गर्न भने बाँकी रहेको छ ।