माछापुच्छ्रे बैंकले एक वर्षमा १ अर्ब ३० करोड नाफा कमायो, ब्याज आम्दानी २५ प्रतिशतले बृद्धि

अर्थ र बाणिज्य

काठमाडौं, २२ साउन । माछापुच्छ्रे बैंकले गत आर्थिक वर्षमा एक अर्ब ३० करोड नाफा कमाएको छ । बैंकले प्रकाशित गरेको अपरिस्कृत वित्तीय विवरण अनुसार आर्थिक वर्ष २०७३/७४ मा बैंकले ब्याज आम्दानी २५ प्रतिशतले बढाएको छ भने नाफा ४६ प्रतिशतले बढाएको छ ।

६ अर्ब ५९ करोड चुक्ता पुँजी रहेको माछापुच्छ्रेले असार मसान्तसम्म ५८ अर्ब ६२ करोड निक्षेप संकलन गरेको छ भने कर्जा विस्तार ५१ अर्ब ८६ करोड रुपैयाँले गरेको छ । अघिल्लो वर्षको असार मसान्तमा माछापुच्र्छे बैंकको निक्षेप ५२ अर्ब २९ करोड थियो भने कर्जा ४४ अर्ब २३ करोड थियो ।

अघिल्लो वर्षको भन्दा पुँजी ४१ प्रतिशतले बढेको हुँदा यसको असर बैंकको रिर्टन अन इक्युटी (आरओई) मा परेको छ । अघिल्लो वर्ष २०.२५ प्रतिशत रहेको आरओई यो वर्ष १४.२७ प्रतिशतमा झरेको छ । आरओई घटेपनि बैंकको प्रति सेयर आम्दानी (इपिएस) भने अघिल्लो वर्षकै यथावत रहेको छ । इपिएस २३ रुपैयाँ ९८ पैसा रहेको छ । अघिल्लो वर्ष इपिएस २३ रुपैयाँ ८ पैसा रहेको थियो ।