टिप्पणी : वाणिज्य बैंकको ‘एटिएम’प्रति सेवाग्राहीको गुनासो

अर्थ र बाणिज्य

- सरस्वती पाण्डे ‘सरस’

हामी पैसा राख्नको लागि सबैभन्दा भरपर्दो माध्यमको रूपमा बैंकलाई लिन्छौँ । तर त्यही बैंकले हामीलाई आवश्यक पर्दा सहयोग गर्न सकिरहेको छैन् । अझ सजिलोको रूपमा प्रयोग गरिने ‘एटिएम’ले त कहिलेकाहीं अति नै समस्यामा पारिरहेको छ । पैसा झिक्न ‘एटिएम’ प्रयोग गर्दा सबै प्रकृया पूरा गरे पनि पैसा आउँदैन । उता खतामा पनि पैसा घटिसकेको हुन्छ । सबै सेवाग्राहीहरूले मोबाइल बैकिङ नगरेका पनि हुन सक्छन् । मोबाइल बैकिङ गर्नेको त एसएमएस आउँछ र तुरुन्तै गएर कम्प्लेन गर्दा एक महिना भित्र पैसा आउँछ भनेर भनिन्छ तर कम्प्लेन नगर्नेको पैसा खातमा आउँछ आउँदैन त्यो बैंकले नै जानोस् । आजभन्दा करीब पाँच महिना अघि राष्ट्रिय वाणिज्य बैंकको कलंकीमा रहेको एटिएमबाट पैसा झिक्न लाग्दा सबै प्रकृया पुरा भयो । तर पैसा भने आएन । चौबिस घण्टा भित्र नआएको पैसा पुनः खातामा जम्मा हुन्छ भनियो तर भएन । कम्प्लेन गर्दा एक महिनाभित्र पैसा आउँछ भनियो ।
एटिएमबाट जुन बेला चाहियो त्यही बेला झिक्न मिल्छ भनेर पैसा राखिन्छ बैंकमा । पैसा चाहिने दिन नै झिक्न गएँ तर पैसा आएन । एक पटक त भयो भयो नै फेरि भदौ सोह्र गते शुक्रबार पैसा झिक्न एटिएम हालेँ । पहिलेझै सम्पूर्ण प्रकृया पनि पूरा भयो तर पैसा भने आएन । फेरि ‘ब्यालेन्स इन्क्वाइरी’ गरेँ, खातामा पैसा घटिसकेछ । आवश्यक परेको बेलामा पूर्ती नहुँदा कस्तो अवस्था कस्तो हुन्छ त्यो भोग्नेलाई मात्रै थाहा छ । कम्प्लेन गर्न जाँदा शुक्रबार दुई बजे नै बैंक बन्द भइसकेछ । शनिबार र आइतबार बिदा भयो । सोमबार दश बजेमात्र बैंक खुल्छ । आफू कार्यालय अफिस दश बजे पुग्नुपर्छ । बिदा लिएर गुनासो गर्न जानेकी कार्यालय जाने ? बैंकमा यस्तो समस्या आउँदा पनि वाणिज्य बैंकले ध्यान दिएको छैन् । सेवाग्राही महिनौदेखि यस्ता समस्या भोग्न बाध्य छन् । एउटा प्रतिनिधि पात्रको रुपमा मैले ध्यानाकर्षण गराएको मात्रै हुँ । यस्ता समस्यालाई कसरी हटाउन सकिन्छ बेलैमा ध्यान जाओस् ।

धादिङ
हाल : काठमाडौँ