नयाँ बसपार्कबाट छयालिस हजार यात्रुले अग्रिम टिकट काटे

अर्थ र बाणिज्य

- अच्युत रेग्मी

काठमाडौँ ३ असोज । दशैँमा घर जान अग्रिम टिकट बुकिङ खुलेको एक हप्ता पुग्दा नयाँ बसपार्कबाट ४६ हजार ४६५ यात्रुले अग्रिम टिकट बुकिङ गरेका छन् । दशैँ आउन केही दिन सुरु भएपनि लामो तथा मझौला दूरीका यात्रुहरुले टिकट लिएका हुन् ।
ल्होत्से बहुउदेश्यीय प्रालिले ४५ वर्षका लागि जग्गा भाडामा लिएर नयाँ बसपार्क सञ्चालन गरेको छ । प्रालिका मानव संशाधन प्रमुख पंकज मल्लले सुरुको दिनमा घर जानका लागि धेरै टिकट लिएपनि पछिल्लो दिनमा घटेको बताए ।
दशैँमा घर जानका लागि भदौ २७ गते मङ्गलबारबाट अग्रिम टिकट बुकिङ खुल्ला गरिएको थियो । भदौ २७ मा ११ हजार ८१७, २८ गते सात हजार ३३६, २९ गते छ हजार ७७४, ३० गते सात हजार ५९६, ३१ गते चार हजार ८९८, असोज १ गते चार हजार ६३० र असोज २ गते तीन हजार ४१४ जनाले अग्रिम टिकट बुकिङ गरेका छन् । प्रालिका मानव संशाधन प्रमुख मल्लले घटस्थापनादेखि नवमीसम्मका लागि मानिसले टिकट बुकिङ गरेको बताए ।
यस्तै देशका विभिन्न भागमा जानका लागि नयाँ बसपार्क, गौशाला, सुन्धारा, पुरानो बसपार्क, कोटेश्वर, बल्खुलगायतका स्थानमा अग्रिम बुकिङ खुला गरिएको छ । त्योमध्ये सबैभन्दा धेरै यात्रु नयाँ बसपार्कबाट बाहिरीने गर्दछन् । यातायात व्यवसायी राष्ट्रिय महासंघका महासचिव सरोज सिटौला दशैँका लागि ७० प्रतिशत टिकट बुकिङ भएकोे बताउँछन् । “सडकको दुरावस्था र वर्षाका कारण धेरै यात्रुहरुले अझैपनि टिकट काटेका छैनन्,”–महासचिव सिटौलाले भने । उनले गत वर्षको तुलनामा यस वर्ष कम टिकट बुकिङ भएको बताए ।
बाटोको दुरावस्था र वर्षाका कारणले गर्दा दशैँ आउनुभन्दा १५ दिन पहिला नै हवाइजहाजको टिकट बुकिङ भइसकेको छ ।
विभागका अनुसार यस वर्ष २० देखि २१ लाख यात्रु दशैँ मान्नका लागि काठमाडौँ उपत्यकाबाट बाहिरिन्छन् । विभागका प्रवक्ता डा.टोकराज पाण्डे १५ देखि १६ लाख यात्रु सार्वजनिक यातायात र पाँच छ लाख निजी यातायातमा बाहिरिने बताउँछन् । “टिकट वितरणमा कुनै समस्या छैन, सहज रुपमा सौहार्दपूर्ण रुपमा वितरण भइरहेको छ”, प्रवक्ता डा.पाण्डेले भने ।