८ मेगावाटको अप्पर नौगाड अन्तिम चरणमा, चैतदेखि विद्युत् उत्पादन थाल्ने

अर्थ र बाणिज्य

काठमाडौँ, ९ पुस । ८ मेगावाट क्षमताको अप्पर नौगाड जलविद्युत् आयोजनाको निर्माण कार्य अन्तिम चरणमा पुगेको छ । अपी पावर कम्पनीले निर्माण गरिरहेको आयोजनाको निर्माण कार्य अन्तिम चरणमा पुगेको हो ।
दार्चुला जिल्लामा आयोजनास्थल रहेको उक्त परियोजनाको भौतिक निर्माण कार्य सकिएकाले आगामी चैतदेखि विद्युत् उत्पादन शुरु गर्ने लक्ष्य राखेको छ ।

कम्पनीका प्रमुख सञ्जीव न्यौपानेले मुलुकमा जारी ऊर्जा संकटलाई समाधान गर्ने लक्ष्यका साथ आयोजना तोकिएको समय भन्दा अगावै सम्पन्न हुन लागेको जानकारी दिनुभयो । सोही जिल्लामा आयोजनास्थल रहेको नेपाल विद्युत् प्राधिकरणले निर्माण गरेको चमेलिया जलविद्युत् आयोजनाले विद्युत् उत्पादन शुरु गरिसकेको अवस्थामा अप्पर नौगाडको समेत विद्युत् थप भएपछि सुदूर र मध्यपश्चिममा विद्युत् आपूर्तिमा सहज विश्वस लिइएको छ ।

कम्पनीको यो दोस्रो आयोजना हो । यसअघि कम्पनीले १७ महिनाको छोटो अवधिमा नै ८.५ मेगावाट क्षमताको नौगाड जलविद्युत् आयोजना सम्पन्न गरी सञ्चालनमा ल्याइसकेको छ । कम्पनीले कूल १८ मेगावाट क्षमताको सौर्य ऊर्जा उत्पादन प्रणालीसमेत जडान गर्ने तयारी गरेको छ । कम्पनीले ४० मेगावाट क्षमताको माथिल्लो चमेलियाको निर्माणको तयारी थालेको छ ।

कम्पनीले आर्थिक वर्ष २०७३/७४ को मुनाफाबाट शेयरधनीलाई आठ प्रतिशत बोनस शेयर दिने भएको तयारी गरेको छ । रु एक अर्ब पाँच करोड कूल चुक्ता पुँजीको आठ प्रतिशत बोनस दिन लागिएको हो । रासस