कामु सीइओ जीवन भट्टराईले गरे सेञ्चुरी बैंकमा लोभलाग्दो प्रगति

काठमाडौं, १४ माघ । सेञ्चुरी कमर्सियल बैंक लिमिटेडले चालु आर्थिक वर्षको दोश्रो त्रैमासमा लोभलाग्दो प्रगति गरेको छ । देशकै कान्छो वाणिज्य बैंकको रुपमा रहेको सेञ्चुरीले चालु आर्थिक वर्षको दोश्रो त्रैमासमा लोभलाग्दो प्रगति गरेको हो । यो बैंकले अघिल्लो वर्ष २२ करोड ३९ लाखबाट खूद नाफा बढाएर ३२ करोड ५१ लाखको उचाईमा पुर्याएको हो ।

पहिलो त्रैमासमा १० करोड ५७ लाख नाफा गरेको यो बैंकले बाँकी तीन महिनामै नाफातर्फ २२ करोड रुपैयाँ थप गरेको छ । हाल बैंकमा सीइओ छैनन् । कामु सीइओको जिम्मेवारी जीवन भट्टराईको काधमा छ । फुल सीइओ नभएको अवस्थामा समेत भट्टराईको कुशल नेतृत्वले बैंकले आशालाग्दो प्रगति गरेको हो ।

यो बैंकको अन्य प्रमुख सूचकहरुमा समेत राम्रो प्रगति भएको छ । अघिल्लो वर्ष ५१ करोड ६० लाखमा सीमित खूद ब्याज आम्दानी वृद्धि भई समीक्षा अवधिमा ७६ करोड माथि पुगेको छ । यस्तै, खर्च नियन्त्रणमा व्यवस्थापनले ध्यान दिंदा संचालन नाफा समेत ३२ करोड ७४ लाखबाट बढेर ३९ करोड २७ लाख पुगेको छ ।

समीक्षा अवधिमा बैंकले ५२ अर्ब १७ करोड निक्षेप संकलन गरी ४७ अर्ब २ करोड कर्जा प्रवाह गरेको छ । अघिल्लो वर्ष ३२ अर्ब ६७ करोड निक्षेप संकलन गरी २९ अर्ब १ करोड मात्र कर्जा प्रवाह गरेको थियो ।

बैंकले रिजर्ब कोषमा समेत राम्रै फड्को मारेको छ । अघिल्लो वर्ष ८३ करोड ५९ लाख रुपैयाँ रहेको कोष बढेर १ अर्ब ७६ करोडको उचाईमा पुगेको छ । त्यस्तै ११ करोड १२ लाख राइट ब्याक गरेको बैंकले सम्भावित जोखिम व्यवस्थापनका लागि १८ करोड १९ लाख प्रोभिजनमा राखेको छ ।

अघिल्लो वर्षको तुलनामा बैंकको खराब कर्जा बढेको छ, तर अघिल्लो त्रैमासको तुलनामा भने घटेको छ । अघिल्लो वर्ष ०.४७ प्रतिशत रहेको यस्तो कर्जा समीक्षा अवधिमा ०.९९ प्रतिशत पुगेको हो । तर, पहिलो त्रैमासमा यस्तो कर्जा १.७७ प्रतिशत थियो ।

Comments