नयाँ विमानस्थल खोल्ने तयारी भईरहेका बेला ११ विमानस्थलको कमाइमात्रै करोडमाथि

अर्थ र बाणिज्य

- रमेश लम्साल/सिबी अधिकारी

काठमाडौँ, १४ माघ । देशभर सञ्चालनमा रहेका कुल २९ विमानस्थलमध्ये ११ वटा विमानस्थलको मात्रै कमाइ एक करोडभन्दा माथि रहेको छ । नेपाल नागरिक उड्डयन प्राधिकरणका अनुसार १८ वटा विमानस्थलको कमाइ कम हुँदा सञ्चालन खर्च चलाउनसमेत नपुग्ने अवस्थामा रहेको छ ।

सरकार र राजनीतिक दलले मुलुकका विभिन्न स्थानमा नयाँ विमानस्थल खोल्ने तयारी गरिरहेका बेला सञ्चालनमा रहेका विमानस्थलको कमाइ नै कमजोर देखिएको हो । सञ्चालनमा नै रहेका विमानस्थलको कमाइ न्यून हुँदा सरकारलाई ती विमानस्थल सेतो हात्तीका रुपमा पालिराख्नुपर्ने बाध्यता आइलागेको छ । त्रिभुवन अन्तर्राष्ट्रिय विमानस्थलको कमाइले नै अधिकांश विमानस्थल सञ्चालन गर्नुपर्ने र अन्य कामसमेत गर्नुपर्ने अवस्था देखिएको छ ।

प्राधिकरणले सार्वजनिक गरेको सन् २०१७ को प्रतिवेदनका आधारमा त्रिभुवन अन्तर्राष्ट्रिय विमानस्थलले ६ अर्ब ६२ करोड ८१ लाख २० हजार ६४ रुपैयाँ आम्दानी गरेको छ । चन्द्रगढी विमानस्थलले दुई करोड १९ लाख ६० हजार रुपैयाँ कमाइ गरेको छ ।

यस्तै विराटनगर विमानस्थलले पाँच करोड ६४ लाख ७७ हजार ७९७, तेन्जिङ हिलारी विमानस्थलले एक करोड ८६ लाख ९८ हजार ५७६, सिमराले एक करोड २३ लाख ३९ हजार २३२, भरतपुर विमानस्थलले दुई करोड ३८ लाख १४ हजार १४ हजार ८८, पोखरा विमानस्थलले ६ करोड ३९ लाख १९ हजार ५०७, गौतमबुद्ध विमानस्थलले तीन करोड ७३ लाख ५१ हजार ७०६ कमाइ गरेका छन् ।

प्राधिकरणका अनुसार नेपालगञ्ज विमानस्थलले चार करोड ५६ लाख ९६ हजार २३९, सिमीकोटले एक करोड, ५४ हजार ११४, धनगढी विमानस्थलले एक करोड २१ लाख ११ हजार कमाइ गरेका छन् । प्राधिकरणका अनुसार थामखर्क विमानस्थलले १४ हजार ३४६ मात्रै कमाइ गरेको छ । चितवनको मेघौली विमानस्थलले २१ हजार ९७७ कमाइ गरेको छ । लामो समयदेखि व्यस्त मानिने जुम्ला विमानस्थलको कमाइ पनि आठ लाख ७६ हजार ८१० मात्रै कमाइ गरेको छ ।

भोजपुर विमानस्थलले १२ लाख कमाइ गर्दा लामीडाँडा विमानस्थलले भने ८६ हजारमात्रै आम्दानी गरेको छ । व्यस्त रहने जनकपुर विमानस्थलको कमाइसमेत ६१ लाखमा सीमित भएको छ । रामेछाप विमानस्थलको पाँच लाख ४० हजार ४६१, तुम्लिङ्टार विमानस्थलको २२ लाख २० हजार ५३३, रुम्जाटारले एक लाख २८ हजार ११७ मात्रै आम्दानी छ ।

मनाङको विमानस्थलले एक लाख २४ हजार ८५४, सुर्खेत ४८ लाख ९५ हजार ४६३, रुकुम सल्ले रु एक लाख ४३ लाख ७४१, रुकुम चौरजहारी रु एक लाख ११ लाख १०६, डोल्पा रु चार ८० हजार ३०८, बाजुरा विमानस्थलको रु छ लाख १७ हजार ८९८ कमाइ छ ।

रारा विमानस्थलले रु १७ लाख ३६ हजार ८२ कमाइ गर्दा फाप्लु विमानस्थलले रु २६ लाख ९० हजार आम्दानी गरेको छ । प्राधिकरणले गत पुसको अन्तिम सातादेखि दाङको टरिगाउँ विमानस्थल सञ्चालनमा ल्याएको छ । निकट भविष्यमा नै बागलुङको बलेवा विमानस्थल पनि सञ्चालनमा ल्याउने तयारी गरिरहेको छ ।

सप्तरीको राजविराजमा रहेको विमानस्थल पनि सञ्चालनमा ल्याउने तयारीमा छ । यस्तै प्रदेश नम्बर ७ को कञ्चनपुर, बैतडीको गोकुलेश्वर विमानस्थल पनि सञ्चालनमा ल्याइने तयारीमा छ । कालीकोट, ओखलढुंगाको खिजी चण्डेश्वरी, गुल्मीको सिमीचौर, इलामको सुकीलुम्बा, अछामको कमलबजार, अर्घाखाँची र लम्जुङमा समेत विमानस्थल निर्माणमा रहेका र निकट भविष्यमा नै सञ्चालनमा ल्याउने तयारी गरिएको छ ।

कालीकोट विमानस्थलको धावनमार्ग निर्माण सम्पन्न भई गत वर्ष नै परीक्षण उडानसमेत भइसकेको छ । अरु विमानस्थल निर्माणको क्रममा छन् । त्रिभुवन अन्तर्राष्ट्रिय विमानस्थलका महाप्रबन्धक देवानन्द उपाध्यायले अन्तर्राष्ट्रिय विमानस्थल र अरु केही विमानस्थलमात्रै सञ्चालन नाफामा रहेको र धेरैजसो विमानस्थल घाटाको व्यापार गरिरहेको बताउनुभयो ।

विमानस्थल निर्माणको माग बढ्दै गएको र सञ्चालनमा समेत घाटा व्यहोर्नुपरेपछि प्राधिकरण पनि के गर्ने भन्ने मेसो पाउन सकेको छैन । राजनीतिक दबाबका आधारमा निर्माण हुने र सञ्चालन गर्नुपर्ने बाध्यतालाई प्राधिकरणले नकार्न सकेको छैन । हाल पोखरा, गौतमबुद्ध विमानस्थल निर्माणका क्रममा छ । रासस