दोलखाबाट प्रतिनिधिसभा सदस्यमा माओवादीका गंगा कार्कीको जित

राजनीति

काठमाडौं । दोलखा जिल्लाबाट प्रतिनिधिसभा सदस्यमा नेकपा माओवादी केन्द्रका गंगा कार्कीले जित हासिल गरेका छन् । कार्कीले ३६ हजार ९९५ मत पाए । उनका निकटतम प्रतिस्पर्धी एमालेका उम्मेदवार बालकृष्ण शिवाकोटीले ३६ हजार ४७७ मत पाएको मुख्य निर्वाचन अधिकृतको कार्यालयले जनाएको छ । कार्कीले ५१८ मतान्तरले चुनाव जितेका हुन् ।

समानुपातिकको गणना भने जारी छ । समानुपातिकको मतपेटिकामा प्रत्यक्षको मतपत्र भेटिए पनि गणना गर्ने निर्णय सर्वदलीय बैठकमा भएका कारण जितको अन्तरको अंक केही तल माथि पर्न सक्ने जनाइएको छ । दोलखासँगै देशभरको निर्वाचन परिणाम प्राप्त भएको छ । अब भने माओवादी केन्द्रको प्रतिनिधिसभामा प्रत्यक्षतर्फ १८ सिट पुगेको छ ।

उता, दोलखाको प्रदेश सभा १ बाट भने कांग्रेसका उम्मेदवार कुन्दनराज काफ्लेले जित हासिल गरेका छन् । काफ्लेले एमालेका उम्मेदवार नरबहादुर श्रेष्ठलाई ७ हजार ८७५ मत अन्तरले पछि पार्दैजित हासिल गरेका हुन् । उनले २३ हजार २३१ मत प्राप्त गरे । एमालेका श्रेष्ठले मत १५ हजार ३५६ मत ल्याए ।

त्यस्तै, प्रदेशसभा २ मा एमालेका उम्मेदवार भरतबहादुर केसी निर्वाचित भएका छन् । केसी १९ हजार ४१४ मत प्राप्त गरी प्रदेशसभा सदस्य निर्वाचित भएका हुन् । केसीका निकटत प्रतिद्वन्द्वी कांग्रेसका बर्मा लामाले १७ हजार ५९५ मत पाएका मुख्य निर्वाचन अधिकृतको कार्यालयले जनाएको छ ।