प्रेस चौतारी नेपालले ‘समृद्धिका लागि संकल्प यात्रा’ विषयक लेखनवृत्ति प्रतियोगिता गर्दै

राजनीति

- न्युज नेपाल

काठमाडौं । प्रेस चौतारी नेपालले समृद्धिका लागि संकल्प यात्रा विषयमा लेखनवृत्ति प्रतियोगिता आयोजना गर्ने भएको छ । प्रेस चौतारीको यही मंसिर १२ र १३ गते दार्चुलामा सम्पन्न केन्द्रीय समितिको तेश्रो बैठकले सो प्रतियोगिता गर्ने निर्णय गरेको हो ।

नेकपा एमालेको पुष्पलाल मध्यपहाडी लोकमार्ग ‘झुलाघाट–चिवाभञ्ज्याङ समृद्धिका लागि संकल्प यात्रा’ सन्दर्भमा हुने लेखनवृत्ति प्रतियोगिताको लागि केन्द्रीय सदस्य समीर बलामीको संयोजकत्वमा केन्द्रीय सदस्यहरु नरेश भण्डारी, रामचन्द्र प्रजापति, सजिव कालाखेती र अमिर लामा रहेको पाँच सदस्यी समिति गठन गरेको छ ।

मंगलवार प्रेस विज्ञप्ति जारी गर्दै पौष १७ गते भित्र ‘नेकपा एमालेको झुलाघाट–चिवाभञ्ज्याङ समृद्धिका लागि संकल्प यात्रा र पुष्पलाल मध्यपहाडी लोकमार्गले पारेको प्रभाव’ विषयमा रहेर स्टोरी र फिचर लेखि प्रेस चौतारी नेपालको इमेल आईडी [email protected] र [email protected] मा पठाउन आह्वान गरेको छ ।

साथै ९८५११६२३८४ नं. को भाईवर वा वाट्सएपमा समेत लेख पठाउन सकिने प्रेस चौतारीले जनाएको छ । प्रतियोगिताको लागि डा। रघु मैनालीको संयोजकत्वमा देवराज आर्यल र निर्मला शर्मा रहेको तीन सदस्यीय निर्णायक समिति गठन गरेको विज्ञप्तिमा उल्लेख छ । प्रतियोगिताबाट प्रथम, द्वितीय र तृतीयका साथै १० वटा सान्त्वना लेखहरु छनौट हुने जनाएको छ। प्रथम, द्वितीय र तृतीयलाई क्रमश तीस, बीस र पन्ध्र हजारका साथै सान्त्वनामा तीन हजारसहित ट्रफी र प्रमाण पत्र प्रदान गरिने संयोजक समीर बलामीले बताएका छन् ।

पुष्पलाल मध्यपहाडी लोकमार्गको वस्तुस्थिती र अवस्था,जनजीवनमा पारेको प्रभाव,पुष्पलाल मध्यपहाडी लोकमार्ग र नेकपा एमालेको सम्बन्ध,नेकपा एमालेको झुलाघाट–चिवाभञ्ज्याङ समृद्धिका लागि संकल्प यात्राको उद्देश्य,उपलब्धी र अभियानको सविस्तार, पुष्पलाल लोकमार्गले स्थापीत गरेको १० नयाँ शहरहरुको वस्तुस्थिथि र संभाव्यता, पहाडी जिल्लाबाट भइरहेको बढ्दो बसाँई सराई र त्यसले पार्ने प्रभावलगायतका विषयमा खोज तथा अध्ययनमूलक र तथ्याङ्कगत लेख रचना, स्टोरी र फिचरहरु लेख्नु पर्ने पनि विज्ञप्तिमा उल्लेख छ ।

लेख रचना, स्टोरी र फिचर कम्तिमा दुई हजार शब्द र बढिमा पाँच हजार शब्दको हुनुपर्ने र उक्त रचना कुनै पनि संचारमाध्यम वा कहिँकतै प्रकाशित नभएको हुनुपर्ने प्रेस चौतारीले जनाएको छ। आगामी माघ २२ गते प्रेस चौतारी नेपालको स्थापना दिवस पारेर छनौट भएको लेख, स्टोरी र फिचरहरु समावेश स्मारिका प्रकाशन गरी विमोचन गर्नुका साथै विजेताहरु घोषणा गर्दै पुरस्कृत गरिने प्रेस चौतारी नेपालका अध्यक्ष गणेश बस्नेतले बताएका छन् ।