मेलुङका अध्यक्षको भ्रष्टाचार मोहः ४ करोडमा हुने काममा १० करोड झ्वाम ?

काठमाडाैं । मेलुङ गाउपालिकाको वडा नम्बर ४ मा भवन निर्माणमा ठूलो घोटाला भएको भन्दै अख्तियार दुरुपयोग अनुसन्धान आयोगमा उजुरी परेको पाइएको छ ।

गाउँपालिकाको भवन निर्माणमा गाउँपालिका अध्यक्ष हिरा कुमार तमाङ, प्रमुख प्रशासकीय अधिकृत सञ्जय शिवाकोटी, भवन इन्जिनियर सञ्जु शिवाकोटी र डिजाइनर सुजन नेपालले ठूलो घोटालाको षडयन्त्र गरेको भन्दै अख्तियारमा उजुरी परेको पाइएको छ ।

दोलखा जिल्लामा पर्ने मेलुङ गाउँपालिकाको वडा नम्बर ४ मा बन्न लागेको भवनमा हिटिङ सिस्टम जडान गर्दै १० करोडमा भवन निर्माणको षडयन्त्र चलेको स्रोतको भनाई छ । दोलखा उच्च हिमाली जिल्ला पनि नभएको र हिटिङ सिस्टम कै आवश्यकता पर्ने स्थिति नभएपनि रकम झ्वाम पार्न अध्यक्ष तमाङसहितको टोली सक्रिय बनेको हो ।

‘नेपालमा समेत यस्तो प्रणाली विरलै मात्रामा उच्च हिमाली क्षेत्रमा जडान गरिएको छ भने चीनले बाक्लो हिमपात हुने र अत्यधिक चिसो हुने स्थानमा जडान गर्ने गरेको पाइन्छ । तर, दोलखाको मेलुङमा यो प्रणालीको आवश्यकताभन्दा पनि भ्रष्टाचारकै निम्ति काम थालिएको हो ।’ एक कर्मचारीले न्यूज नेपालसंग भने ।

अख्तियारमा उजुरी असार २६ गते नै पेश भएको थियो भने सी ०८३०२९ (C-083029) दर्ता नम्बर रहेको छ । अख्तियारले पनि यो विषयमा गम्भीरतापूर्वक अनुसन्धान थालेको स्रोतको दाबी छ ।

सामान्यतया ठेकेदारसंग प्रमुख प्रशासकीय अधिकृतले सम्झाैता गर्ने प्रचलन छ । तर, मेलुङमा भने अध्यक्ष तमाङले नै सम्झाैता गरेर राज्य कोषको दुरुपयोगमा छलाङ मार्ने प्रयास गरेका हुन् ।

अख्तियार दुरुपयोग अनुसन्धान आयोगमा परेको उजुरीमा अति आवश्यक पर्ने भएकाले छिटो छानविनको माग गरिएको छ ।

‘४ करोडमा हुने काम १० करोड पुर्‍याइएको छ । राज्य कोषको दोहनका लागि आवश्यक नै नपर्ने हिटिङ सिस्टम भनिएको छ । सर्वसाधारण जनताले विकास समृद्धि चाहेको बेला गाउँपालिका भने कसरी हुन्छ भ्रष्टाचार गर्न उद्दत देखिन्छ ।’ एक पदाधिकारीले न्यूज नेपालसंग भने ।

Comments