रविलाई छाड्ने न्यायाधीश वासुदेव आचार्य काज भन्दै सर्वोच्च पुगे, वरियता मिच्ने रास्वपाको न्यायाधीश राडारमा के छ?

काठमाडौं । उच्च अदालत तुलसीपुर वुटवल इजलासका कामु न्यायाधीश वासुदेव आचार्य सर्वोच्च अदालतमा काजमा खटिएका छन्। उनी उच्च अदालत बुटवलमा कामु मुख्य न्यायाधीशका रूपमा कार्यरत छन्।

आचार्य यसअघि चर्चित सहकारी ठगी प्रकरणमा रवि लामिछाने लाई थुनामुक्त गर्ने आदेश दिने संयुक्त इजलासको नेतृत्व गरेका थिए। गएको पुस ३ गते आचार्य र अर्का न्यायाधीश तेजनारायण पौडेलको संयुक्त इजलासले रविलाई थुनामुक्त गर्न आदेश दिएको थियो।

रवि पुसमा थुनामुक्त हुने आदेशसंगै रास्वपामा वालेन्द्र शाहसहितका नेताहरुलाई भित्र्याउन सक्रिय बनेका हुन्। रवि जेलमै रहेको भएमा सम्भवत रास्वपा अहिलेको स्थितिमा हुनसक्ने विषयमा समेत प्रश्न उब्जिने गरेको छ।

न्यायिक वृत्तमा आचार्यलाई सर्वोच्च अदालतमा काजमा ल्याइनु चासोका साथ हेरिएको छ। बिरामी भन्दै काजमा ल्याइएको बताइए पनि उनले आफू अब सर्वोच्च अदालतको न्यायाधीश बन्ने भन्दै वुटवलबाट बाहिरिएको स्रोतको दाबी छ।

वि.सं. २०२२ जेठ २५ गते जन्मिएका आचार्य २०७३ पुस २९ गते उच्च अदालतको न्यायाधीश नियुक्त भएका थिए। हाल उच्च अदालतका न्यायाधीशहरूमध्ये उनी १७औँ वरियतामा छन्। उनीभन्दा माथि पाँच जना मुख्यन्यायाधीश रहेका छन्।

न्यायपालिका भित्र पछिल्लो समय नियुक्ति, वरियता र क्षमताको आधारमा हुने निर्णयबारे विभिन्न बहस चलिरहेका बेला आचार्यको सर्वोच्च अदालत प्रवेशलाई अर्थपूर्ण रूपमा हेरिएको छ। रास्वपाले भर्खरमात्रै सर्वोच्चको प्रधानन्यायाधीश सिफारिसमा वरियता मिच्दै क्षमताको आधारमा अघि बढ्न थालिएको झूठो जिकिर गरेको खुलासा भइसकेको छ।

चर्चित ८० भाई मध्येका उनी पनि हुन्। नियुक्ति अघि उनी नेपाली कांग्रेस निकट डेमोक्रेटिक लयर्स एशोशियसनमा आबद्ध थिए।

Comments