प्रचण्ड-माधव उपस्थित बैठकमा सुदूरपश्चिम प्रदेशका दुई सांसद अनुपस्थित

काठमाडौं । नेपाली कम्युनिस्ट पार्टीका सुदूरपश्चिम प्रदेशका दुई सांसदले संसदीय दलको बैठक बहिस्कारगरेको भन्दै आलोचना बढेको छ।

स‌ंसदीय दलको बैठकमा कारबाही गर्नुपर्ने माग गरिएका सांसदद्वय घनश्याम र रामेश्वर चौधरी नाउपाभित्रको विवादका बेला तत्कालीन संरक्षक रेशमलाल चौधरीको पक्षमा उभिदै आएका थिए । तर, पछि रञ्जितासँगै नेकपामा आएका हुन् ।

नेकपाका संयोजक प्रचण्ड र सहसंयोजक माधव नेपाल सहभागी भएको सुदूरपश्चिम प्रदेश संसदीय दलको बैठकमा दुई सांसद अनुपस्थित भएपछि पार्टीभित्र कारबाही गर्नुपर्ने माग उठ्न थालेको छ ।

शीर्ष नेतृत्वको उपस्थितिमा आयोजित बैठकलाई पार्टी एकता पछिको शक्ति प्रदर्शन र संगठन सुदृढीकरणको महत्वपूर्ण अवसरका रूपमा हेरिएको थियो। बैठकमा समसामयिक राजनीति, पार्टी संगठन विस्तार, प्रदेशस्तरीय रणनीति तथा आगामी राजनीतिक कार्यक्रमबारे छलफल भएको बताइएको छ।

तर, सुदूरपश्चिमजस्तो नेकपाको प्रभाव बलियो मानिने प्रदेशमै दुई सांसद अनुपस्थित देखिनुले आन्तरिक असन्तुष्टि, शक्ति सन्तुलन वा नेतृत्व व्यवस्थापनप्रतिको असहजताको संकेत हुनसक्ने चर्चा सुरु भएको छ। पार्टीका केही नेताहरूले यसलाई सामान्य अनुपस्थिति भन्दा बढी राजनीतिक सन्देशका रूपमा समेत व्याख्या गर्न थालेका छन्।

यद्यपि अनुपस्थित सांसदहरूले बैठकमा सहभागी नभएको कारण सार्वजनिक गरेका छैनन् भने पार्टी नेतृत्वले पनि यस विषयमा औपचारिक प्रतिक्रिया दिएको छैन।

हालै विभिन्न कम्युनिस्ट घटकबीच एकता भएर बनेको नेकपाभित्र नेतृत्व बाँडफाँट, संगठन संरचना र जिम्मेवारी व्यवस्थापनलाई लिएर आन्तरिक छलफल तथा शक्ति समीकरणको बहस चलिरहेका बेला यो घटनालाई अर्थपूर्ण रूपमा हेरिएको छ।

Comments