पत्रकार किशोर श्रेष्ठलाई धम्क्याउने प्रयासप्रति नेपाल पत्रकार महासंघको आपत्ति

breaking news

- न्यूज नेपाल

काठमाडौं । नेपाल पत्रकार महासंघले समाचारका विषयवस्तुलाई लिएर पत्रकार किशोर श्रेष्ठलाई प्रहरी प्रयोग गरी धरपकड गर्ने प्रयास भएको भन्दै गम्भीर आपत्ति जनाएको छ।

महासंघले शुक्रबार प्रेस विज्ञप्ति जारी गर्दै यस्तो गतिविधिले स्वतन्त्र प्रेस र लोकतान्त्रिक मूल्य–मान्यतामाथि प्रहार गरेको जनाएको हो।

महासंघका अनुसार केही दिनयता जनआस्था साप्ताहिक र जनआस्था डटकममा मन्त्री र सत्ताधारी दलका नेतासम्बन्धी समाचार प्रकाशित भएपछि प्रधान सम्पादक श्रेष्ठमाथि विभिन्न दबाब सिर्जना गरिएको छ।

काठमाडौं उपत्यका अपराध अनुसन्धान कार्यालयको जिम्मेवारी लिएका प्रहरी अधिकारीहरूको निर्देशनमा पत्रकारलाई धम्क्याउने, धरपकड गर्ने तथा समाचारको स्रोत खुलाउन दबाब दिने गतिविधि भएको महासंघको दाबी छ।

विज्ञप्तिमा समाचार लेखेकै आधारमा पत्रकारमाथि गरिएको व्यवहार स्वतन्त्र प्रेस र लोकतन्त्रविरुद्ध भएको उल्लेख गर्दै यस्ता गतिविधि तत्काल रोक्न माग गरिएको छ। साथै महासंघले प्रेस काउन्सिल नेपालमार्फत समाधान खोज्न सकिने विषयमा प्रहरी हस्तक्षेप अस्वीकार्य भएको जनाएको छ।

महासंघले पत्रकार श्रेष्ठप्रति भएको व्यवहार सच्याउन र समाचारप्रति विमति भए प्रेस काउन्सिलमार्फत कानुनी प्रक्रियामा जान आग्रह गरेको छ। साथै पत्रकारलाई धम्क्याउने व्यक्तिको पहिचान गरी कानुनी कारबाही गर्न पनि माग गरिएको छ।