विद्यालय पोशाकमै विद्यार्थीलाई प्रदर्शनमा उतार्ने योजनाबद्ध प्रयास भएको आयोगको निष्कर्ष

काठमाडौं । गत वर्ष भदौमा भएको जेनजी प्रदर्शनमा विद्यार्थीहरूलाई विद्यालय पोशाकमै सहभागी गराउन योजनाबद्ध रूपमा आह्वान गरिएको खुलासा भएको छ ।

राष्ट्रिय मानव अधिकार आयोगले बुधबार सार्वजनिक गरेको प्रतिवेदनअनुसार नेपाल प्रहरीको नक्कली फेसबुक पेज बनाएर त्यसमार्फत ‘विद्यालय पोशाकमा आए प्रहरीले बल प्रयोग गर्दैन’ भन्ने सन्देश फैलाइएको थियो । उक्त सन्देशमार्फत विद्यार्थीहरूलाई प्रदर्शनमा सहभागी हुन प्रेरित गरिएको आयोगले जनाएको छ ।

प्रतिवेदनमा सामाजिक सञ्जालमार्फत भ्रमपूर्ण सामग्री प्रसारण गरेर विद्यार्थीलाई प्रदर्शनमा उतार्ने तथा मानव ढालका रूपमा प्रयोग गर्ने प्रयास भएको उल्लेख गरिएको छ । आयोगका अनुसार घटनापछि प्रदर्शनपूर्व सक्रिय रहेका केही सामाजिक सञ्जाल खाता निष्क्रिय बनाइएको सुरक्षाकर्मीहरूको बयानबाट समेत यो विषय पुष्टि हुने देखिएको छ ।

आयोगले प्रदर्शनअघि नै सामाजिक सञ्जालमा यस्ता सामग्री व्यापक रूपमा फैलिइसक्दा पनि सुरक्षा निकायले आवश्यक सक्रियता नदेखाएको टिप्पणी गरेको छ । नक्कली खाता पहिचान गरी बन्द गराउने, भ्रमपूर्ण सूचना चिर्ने तथा सम्भावित जोखिम रोक्ने काम प्रभावकारी रूपमा हुन नसकेको भन्दै आयोगले राज्य संयन्त्रमाथि गम्भीर प्रश्न उठाएको छ ।

प्रतिवेदनमा प्रदर्शन हिंसात्मक हुन सक्ने पर्याप्त संकेत हुँदाहुँदै पनि सरकार र सुरक्षा निकायको पूर्वतयारी कमजोर रहेको निष्कर्ष निकालिएको छ । आयोगले घटनाको समग्र अनुसन्धान गरी जिम्मेवार पक्षमाथि आवश्यक कानुनी कारबाही गर्न समेत सुझाव दिएको छ ।

Comments