फ्लाईदुबईले सेप्टेम्बरदेखि पोखरा–दुबई दैनिक उडान गर्ने, मेयर आचार्यद्वारा सेवा सफल बनाउन अपिल

काठमाडौं । पोखरा अन्तर्राष्ट्रिय विमानस्थलबाट नियमित अन्तर्राष्ट्रिय उडान सञ्चालन गर्ने दिशामा महत्वपूर्ण प्रगति भएको छ।

उच्चस्तरीय सुरक्षा, सेफ्टी तथा सञ्चालनसम्बन्धी निरीक्षण सम्पन्न भएपछि फ्लाईदुबईले आगामी २३ सेप्टेम्बर २०२६ देखि पोखरा–दुबई दैनिक उडान सञ्चालनका लागि अनुमति प्राप्त गरेको पोखरा महानगरपालिकाका मेयर धनराज आचार्यले जानकारी दिएका छन्।

मेयर आचार्यले सामाजिक सञ्जालमार्फत खुसी व्यक्त गर्दै यो उपलब्धि केवल नयाँ हवाई सेवा थपिने विषय मात्र नभई पोखराको अन्तर्राष्ट्रिय पहिचान स्थापित गर्ने, पर्यटन प्रवर्द्धन गर्ने, आर्थिक गतिविधि विस्तार गर्ने तथा काठमाडौं केन्द्रित हवाई चापलाई विकेन्द्रीकरण गर्ने ऐतिहासिक अवसर भएको बताएका छन्।

उनका अनुसार दुबईसँग प्रत्यक्ष हवाई सम्पर्क स्थापित भएपछि मध्यपूर्व, युरोप र अफ्रिकासहित ३०० भन्दा बढी सहरसँग पोखराको पहुँच विस्तार हुनेछ। यसले पोखरालाई अन्तर्राष्ट्रिय हवाई सञ्जालमा थप मजबुत रूपमा जोड्ने विश्वास गरिएको छ।

मेयर आचार्यले उक्त उपलब्धि हासिल गर्न नेपाल नागरिक उड्डयन प्राधिकरण, पर्यटनमन्त्री गणेश पौडेल, युनिभर्सल ट्राभल्सका अध्यक्ष पराशर प्रसाई तथा सम्बन्धित निकाय र सम्पूर्ण टोलीको योगदान रहेको उल्लेख गर्दै सबैप्रति आभार व्यक्त गरेका छन्।

यो पनि पढ्नुहोस

पोखराबाट उडान भर्न फ्लाई दुबई इच्छुक, उपाध्यक्ष लुकाज र पोखरा नगर प्रमुखबीच भेट

साथै उनले प्रारम्भिक चरणमा उडान सेवा दिगो बनाउन पर्यटन व्यवसायी, पोखरेली नागरिक तथा स्वदेश–विदेशमा रहेका नेपालीलाई पोखरा–दुबई रुट प्रयोग गरी साथ दिन आग्रह गरेका छन्।

“हामी सबैको साथ र विश्वासले यो उडान नियमित मात्र होइन, दीर्घकालीन रूपमा सञ्चालन हुने सेवा बन्नेछ,” मेयर आचार्यले भनेका छन्।

नेपालको तेस्रो अन्तर्राष्ट्रिय हवाई प्रवेशद्वारका रूपमा रहेको पोखरा अन्तर्राष्ट्रिय विमानस्थलबाट नियमित अन्तर्राष्ट्रिय उडान सुरु हुने तयारीलाई पर्यटन क्षेत्रका लागि महत्वपूर्ण उपलब्धिका रूपमा हेरिएको छ।

Comments