पोखराबाट उडान भर्न फ्लाई दुबई इच्छुक, उपाध्यक्ष लुकाज र पोखरा नगर प्रमुखबीच भेट

अर्थ र बाणिज्य

पोखरा । विश्वको प्रमुख हवाई सेवा प्रदायक फ्लाई दुबईले पोखरा अन्तर्राष्ट्रिय विमानस्थलबाट उडान भर्ने इच्छा देखाएको छ । कम्पनीका उड्डयन सुरक्षा उपाध्यक्ष एड्रियन लुकाजले पोखरा महानगरका प्रमुख धनराज आचार्यसँग मंगलबार भेट गरी यस्तो चासो राखेका हुन् । उड्डयन क्षेत्रमा २० वर्षभन्दा लामो अनुभव भएका लुकाजले पोखरासँग जोडिन पाए यहाँको पर्यटनका लागि सुखद हुने बताए ।

उड्डयन सुरक्षा र जोखिम व्यवस्थापनमा विशेषज्ञता हासिल गरेका उनले विमानस्थलको मापदण्डबारे पनि जानकारी लिए । लुकाजले भने, ‘पोखराको सुन्दरताले मलाई प्रभावित पारेको छ, यहाँ उडान भर्न हामी इच्छुक छौँ ।’ उनले अन्तर्राष्ट्रिय र स्थानीय सुरक्षा मापदण्डका आधारमा कम्पनीले उडानका लागि आवश्यक प्रक्रिया अघि बढाउन सक्ने संकेत गरे ।

भेटमा नगर प्रमुख आचार्यले नियमित अन्तर्राष्ट्रिय उडान सञ्चालनका लागि आफूले निरन्तर पहल गरिरहेको बताए । दुई देशबीचको पर्यटन बढाउन सिधा उडानको भूमिका महत्वपूर्ण रहने उनको भनाइ छ । आचार्यले भने, ‘विमानस्थल अन्तर्राष्ट्रिय उडान भर्न पूर्ण रुपमा सक्षम छ, हाल चार्टर उडानहरु पनि भइरहेका छन् ।’ पोखरा पर्यटनको राजधानी भएकाले विश्व बजारमा प्रवर्द्धन गर्न नियमित उडान आवश्यक रहेको उनले उल्लेख गरे ।

आचार्यले कम्पनीका तर्फबाट उडानका लागि विशेष पहल गर्न लुकाजलाई अनुरोध गरे । नेपाल सरकारसँग पनि यस विषयमा पटक पटक संवाद भएको उनले जानकारी दिए । भेटमा महानगरका प्रमुख प्रशासकीय अधिकृत मुक्तिराम अर्याल र पोखरा भ्रमण वर्षका संयोजक गोपीबहादुर भट्टराईको पनि उपस्थिति थियो ।