पोखरा-लिन्जीबीच सहकार्य विस्तारबारे शिष्टाचार भेटवार्ता

breaking news

- न्यूज नेपाल

पोखरा । पोखरा महानगरपालिकाका प्रमुख धनराज आचार्यसँग चीनको भगिनी सहर लिन्जीका वैदेशिक मामिला उप–निर्देशक तथा सिपीसीका सचिव डानजेङ साङ्झोउ (Dangeng Sangzhu) नेतृत्वको प्रतिनिधिमण्डलले शिष्टाचार भेटवार्ता गरेको छ।

भेटवार्ताका क्रममा नेपाल–चीन तथा पोखरा–लिन्जीबीचको कूटनीतिक सम्बन्ध, आपसी हित र सहकार्य विस्तारका विषयमा छलफल भएको महानगरपालिकाले जनाएको छ। विशेषगरी पर्यटन प्रवर्द्धन, शिक्षा, स्वास्थ्य, खेलकुद, कृषि तथा प्रविधि, र सांस्कृतिक क्षेत्रमा द्विपक्षीय ज्ञान तथा सीप आदानप्रदानलाई अझ सुदृढ बनाउने विषयमा जोड दिइएको थियो।

भेटमा पोखरा महानगर प्रमुख आचार्यसँगै उपप्रमुख मञ्जुदेवी गुरुङ, प्रमुख प्रशासकीय अधिकृत मुक्तिराम अर्याल, प्रशासन महाशाखा प्रमुख कृष्णप्रसाद तिवारी, नगर प्रमुखको सचिवालय प्रमुख पूर्ण लामा तथा नेपाल–चीन फ्रेन्डसिप एसोसिएसनका विश्वशंकर पालिखे सहभागी थिए।

त्यसैगरी लिन्जी प्रतिनिधिमण्डलमा साङ्झोउसहित शिक्षा तथा खेलकुद विभागका उप–निर्देशक लिउ बिन, संस्कृति तथा पर्यटन विभागका उप–निर्देशक चेन जिङसिङ तथा वैदेशिक विभागकी अधिकृत डेजी बाईझोङ सहभागी रहेका थिए।

दुवै पक्षले आगामी दिनमा पारस्परिक सहकार्यलाई थप प्रभावकारी बनाउँदै दीर्घकालीन सम्बन्ध विस्तार गर्ने प्रतिबद्धता व्यक्त गरेको बताइएको छ।