अब नेपालमा पनि ‘नेटवर्क आर्क ब्रिज’ बन्ने !

अर्थ र बाणिज्य

काठमाडौं , ११ असोज । सिड्नीको ओपेरा हाउसको पछाडितिर देखिने ‘हार्वर ब्रिज’का बारेमा सुन्नु वा देख्नुभएको होला । अब नेपालमा पनि यस्तै पुल बन्ने भएको छ । यदि योजना अनुसार समयमै काम हुने हो भने अबको झण्डै डेढ वर्षमा यस्तै अत्याधुनिक पुल काठमाडौंको बिजुलीबजारमा ठडिनेछ ।

काठमाडौं उपत्यका सडक विस्तार आयोजनाले बिजुलीबजारस्थित धोबीखोला र तिनकुनेस्थित बाग्मती नदीमा नेटवर्क आर्क ब्रिज’ निर्माण गर्ने भएको छ । यो नेपालकै पहिलो ‘नेटवर्क आर्क ब्रिज’ हुनेछ । विश्वभर रुचाउन थालिएको यस प्रविधिको पुल बलियो मात्रै नभएर सौन्दर्य प्रवर्धनको पक्षले पनि उत्कृष्ट मानिने आयोजनाका इञ्जिनियर बिरेन्द्रकुमार यादवले बताए ।

सडक विस्तार आयोजनाका अनुसार बिजुलीबजार र तिनकुनेमा अहिले रहेको पुलको दायाँ बायाँ ४ वटा पुल बन्नेछन् । धोबीखोलामा पुल निर्माणका लागि काम सुरु भइसकेको छ भने बाग्मती नदीमा बन्ने पुलको डिजाइन स्वीकृतिको अन्तिम चरणमा छ । दुबै स्थानमा पुल निर्माणका लागि ठेक्का भने स्वीकृत भइसकेको छ ।

अहिले रहेको पुललाई यथावत राखी सडकको सर्भिस लेनमा दुबैतर्फ ‘आर्क’ पुल जडान गरिनेछ । पुल निर्माण भएपछि सर्भिस लेन (मुल सडकको दायाँ(बायाँको लेन)बाट गुडेका सवारीले पुलको बीच लेनमा आउनुपर्ने छैन । र, दायाँ(बायाँतर्फका सर्भिस लेनमा सार्वजनिक सवारीको चाप बढी हुन्छ ।

माइतीघर(तीनकुने सडकखण्डका सर्भिस लेनहरु नयाँ पुलसँगै जोडिनेछन् । अहिले सर्भिस लेनमा आएका सवारी पनि पुल हुँदै वार(पार गर्छन् । र पुनः मोडिएर सर्भिसलेनमा लैजानुपर्ने बाध्यता छ । यो बाध्यतालाई अब बन्ने ४ वटा पुलले हटाइदिने इञ्जिनियर यादवले बताए ।