विश्व क्रिकेट लिग च्याम्पियनसिपका लागि प्रारम्भिक टोलीको घोषणा

खेलकुद

काठमाडौं, २२ कात्तिक । आइसिसी विश्व क्रिकेट लिग च्याम्पियनसिप अन्तर्गत आउँदो महिना युएइसँग हुने खेलका लागि प्रारम्भिक नेपाली टोलीको घोषणा भएको छ । अन्तर्राष्ट्रिय क्रिकेट परिषद आइसिसीका प्रतिनिधि अमिनुल इस्लाम, मुख्य प्रशिक्षक जगत टमाटा र कप्तान पारस खड्का सम्मिलित छनौट समितिले २६ जना खेलाडी छनौट गरेको हो ।

टोलीमा पारस खड्का, ज्ञानेन्द्र मल्ल, शरद भेषावकर, वसन्त रेग्मी, सोमपाल कामी, विनोद भण्डारी, सागर पुन, दिपेन्द्रसिंह ऐरी, सन्दिप लामिछाने, मो. आरिफ शेख, ललित भण्डारी, सुशन भारी, सुशील कँडेल रहेका छन् । त्यस्तै नरेश बुढाऐर, शक्ति गौचन, जितेन्द्र मुखिया, मेहबुब आलम, शौरभ खनाल, हसिम अन्सारी, सिद्धान्त लोहनी, दिलिप नाथ, विक्रम सोब, सुनिल धमला, अनिल मण्डल र
कुशल भुर्तेल टोलीमा परेका छन् ।

मलेसियामा हुने १९ वर्षमुनिको एशिया कप क्रिकेटमा गरेको प्रदर्शनका आधारमा १९ वर्षमुनिका दुई जना खेलाडीलाई पनि प्रारम्भिक टोलीमा थपिने छ । सबै २८ जनालाई प्रशिक्षणमा राखेर अन्तिम टोलीको घोषणा गरिने छ । नेपालले मंसिर २० र २२ गते युएईसँग उसैको घरेलु मैदान शेख जियाद स्टेडियम आबुधाबीमा खेल्नेछ ।

गएको महिना भएको छैटौं चरणको खेलमा हङकङसँग पराजित भएपछि नेपाल डिभिजन दुईमा झरिसकेको छ । ९ अंकसहित नेपाल छैटौं स्थानमा छ भने ६ अंक मात्र बटुलेको युएई पुछारमा छ । युएई र नेपालसँगै नामिबिया पनि डिभिजन दुईमा झरिसकेका छन् ।