विश्वकपमा एम्बापेको अर्को कीर्तिमान, गोल्डेन बुट दौडमा शीर्ष स्थान कायम

न्युयोर्क । फ्रान्सका स्टार फरवार्ड किलियन एम्बापेले मोरक्कोविरुद्ध गोल गर्दै विश्वकप फुटबलमा आफ्नो कुल गोल सङ्ख्या २० पुर्‍याएका छन्। केवल २० खेलमै यो उपलब्धि हासिल गरेका २७ वर्षीय एम्बापे विश्वकपमा २० गोल गर्ने सबैभन्दा कान्छा खेलाडी बनेका छन्।

यसअघि अर्जेन्टिनाका कप्तान लियोनेल मेसीले ३८ वर्षको उमेरमा विश्वकपमा २० गोलको आँकडा पूरा गरेका थिए। सर्वाधिक विश्वकप गोलकर्ताको सूचीमा एम्बापे अहिले मेसीभन्दा एक गोलले मात्र पछाडि रहेका छन्।

गोल्डेन बुटको प्रतिस्पर्धामा पनि एम्बापेले पुनः अग्रता बनाएका छन्। मेसी र एम्बापे दुवैले समान आठ–आठ गोल गरेका भए पनि बढी एसिस्टका आधारमा एम्बापे शीर्ष स्थानमा छन्।

यससँगै एम्बापेले अर्को ऐतिहासिक उपलब्धि पनि आफ्नो नाममा दर्ता गरेका छन्। उनी विश्वकपका दुई फरक संस्करणमा आठ वा सोभन्दा बढी गोल गर्ने पहिलो खेलाडी बनेका हुन्। अघिल्लो विश्वकपमा पनि आठ गोलसहित उनले गोल्डेन बुट जितेका थिए भने फाइनलमा अर्जेन्टिनाविरुद्ध ह्याट्रिक गर्दै विशेष कीर्तिमानसमेत कायम गरेका थिए।

एम्बापे दुई फरक विश्वकप संस्करणमा दोहोरो अङ्कमा गोल र एसिस्टको योगदान गर्ने पहिलो खेलाडी पनि बनेका छन्। अघिल्लो संस्करणमा आठ गोल र दुई एसिस्ट गरेका उनले यसपटक आठ गोलसँगै तीन एसिस्ट गरिसकेका छन्।

विश्वकपको नकआउट चरणमा सर्वाधिक १२ गोल गर्ने कीर्तिमानसमेत अहिले एम्बापेकै नाममा छ। यस सूचीमा ब्राजिलका लियोनिडास र रोनाल्डो समान आठ–आठ गोलसहित दोस्रो स्थानमा रहेका छन्।

फ्रान्सका लागि विश्वकपमा सर्वाधिक २० खेल खेल्ने ह्युगो लोरिसको कीर्तिमान पनि एम्बापेले बराबरी गरेका छन्। सेमिफाइनलपछि उनी फ्रान्सका लागि विश्वकपमा सबैभन्दा धेरै खेल खेल्ने खेलाडी बन्नेछन्।

एम्बापे फ्रान्सका सर्वाधिक गोलकर्ता पनि हुन्। उनले राष्ट्रिय टोलीका लागि १०४ खेलमा ६४ गोल गरिसकेका छन्। विश्वकप सुरु हुनुअघि उनी फ्रान्सका पूर्व स्ट्राइकर ओलिभर जिरुभन्दा पछाडि थिए।

Comments