‘२० औँ एसियाली खेलकुद’ को औपचारिक उद्घाटन आज हुँदै

खेलकुद

काठमाण्डौ । आज २० औँ एसियाली खेलकुद (एसियाड) को औपचारिक उद्घाटन समारोह आज हुँदैछ । जापानको आइची–नागोयामा आयोजना भइरहेको उद्घाटन समारोहमा सहभागी हुने मार्चपासमा नेपालको राष्ट्रिय झण्डा बक्सिङका चन्द्रबहादुर थापा र कबड्डीकी मानमती विष्टले बोक्ने भएका छन् ।

राष्ट्रिय खेलकुद परिषद्का अनुसार चन्द्रबहादुर थापा दुबईमा भएको आईबा विश्व पुरुष बक्सिङ च्याम्पियनसिपका कांस्य पदक विजेता हुन् । यस्तै, मानमती विष्ट १९औँ एसियाली खेलकुदमा ऐतिहासिक कांस्य पदक जितेको नेपाली महिला कबड्डी टोलीकी कप्तान थिइन् ।

यो खेलमा नेपालबाट २१ खेलमा १३५ खेलाडी सहभागि छन् । आजदेखि औपचारिकरुपमा शुरु हुने प्रतियोगिता यही असोज १८ गतेसम्म चल्नेछ ।

एसियाका करिब १७ हजारभन्दा बढी खेलकर्मी यस खेल महाकुम्भमा सहभागिता जनाउन अहिले जापानको आइची नागोयामा छन् । यो सङ्ख्या ओलम्पिकभन्दा पनि धेरै हो । एसियाडलाई ओलम्पिकपछिको विश्वकै दोस्रो ठुलो खेलकुद प्रतियोगिता मानिन्छ तर खेल र खेलाडी सङ्ख्याको हिसाबले पछिल्लो पेरिस ओलम्पिकभन्दा आइची नागोया एसियाड बृहत् बनेको छ । नागोयाबाहेक टोकियो, सिजोका, गफु र ओसाकामा पनि केही खेल खेलाइने छ । खेलस्थल मात्र ५४ वटा छन् । पछिल्लो पेरिस ओलम्पिकमा ३२ खेल थिए भने आइची नागोया एसियाडा ४३ खेल समावेश गरिएको छ ।