सन्दीप लामिछानेलाई अष्ट्रेलियन पूर्व क्रिकेटर रिकी पोन्टिङको प्रशिक्षण

खेलकुद

काठमाडौं, १४ माघ । युवा क्रिकेटर सन्दिप लामिछानेलाई अष्ट्रेलियन पूर्व क्रिकेटरले प्रशिक्षण दिने भएका छन् । इण्डियन प्रिमियर लिग (आइपिएल) क्रिकेटमा दिल्ली डेयर डेभिल्समा आवद्ध भएका सन्दिपलाई दिल्लीका मुख्य प्रशिक्षक रिकी पोन्टिङले प्रशिक्षण दिने भएका हुन् ।

सोमबार दिल्लीले २० लाख भारुमा सन्दिपलाई टिममा किनेको थियो । अक्सनमा रिकी पोन्टिङ पनि सहभागी थिए । अष्ट्रेलियाका लागि विश्वकप जिताउने कप्तान पोन्टिङ यो वर्ष दिल्लीको प्रशिक्षक छन् । दिल्लीले अष्ट्रेलियन अलराउण्डर ग्लेन म्याक्सवेललाई पनि ९ करोड भारुको बोली लगाएर टिममा अनुबन्ध गरेको छ ।

दिल्लीले म्याक्सवेलमाथि ९ करोड बोली लगाए पनि पञ्जाव किंग्स इलावेनले राइट टु म्याच कार्ड प्रयोग गरी दिल्लीबाट उनलाई खोस्न सक्थ्यो । तर बलिउड नायिका प्रिती जिन्टाले म्याक्सवेलप्रति रुचि नदेखाएपछि म्याक्सवेल दिल्लीका सबैभन्दा महँगा खेलाडी बने ।

जिएमआर समूहको दिल्लीमा भारतका पुराना ओपनर ब्याट्सम्यान गौतम गम्भीर पनि छन् । दिल्लीले म्याक्सवेल वा गम्भीर मध्ये एक जनालाई कप्तान बनाउने छ । म्याक्सवेल कप्तान बनेमा अष्ट्रेलियन क्रिकेटर माइकल क्लार्कका प्रिय पात्र सन्दीपले अष्ट्रेलियन प्रशिक्षक र अष्ट्रेलियन खेलाडीकै छत्रछायामा आफ्नो खेल कौशल सुधार्ने मौका पाउने छन् ।

हङकङमा आफ्नो टिमबाट खेलाएको क्लार्कले सन्दीपका लागि अष्ट्रेलियामा अभ्यास गर्ने अवसर समेत दिलाएका थिए । सन्दीप दिल्लीमा छानिएकोमा क्लार्कले खुसी व्यक्त गर्दै बधाईसमेत दिएका छन् ।

http://news-nepal.com/735932/