महिला राष्ट्रिय क्रिकेट प्रतियोगिता फागुन ९ गतेदेखि धनगढीमा हुने

खेलकुद

धनगढी, १ फागुन । फागुन ९ गतेदेखि धनगढीमा राष्ट्रिय क्रिकेट प्रतियोगिता हुने भएको छ । प्रधानमन्त्री कप महिला राष्ट्रिय क्रिकेट प्रतियोगिता धनगढीमा पहिलो पटक हुन लागेको हो । महिला राष्ट्रिय क्रिकेट प्रतियोगिताको लागि तयारी तीव्र पारिएको छ ।

फागुन ९ देखि १४ गतेसम्म फाप्ला क्रिकेट मैदानमा हुने प्रतियोगिताका लागि मूल समिति गठन गरेर काम अगाडि बढाइएको मंगलबार पत्रकार सम्मेलन गरी जानकारी दिइएको छ । प्रतियोगितामा साविकका ५ विकास क्षेत्र र विभागीय टोली एपीएफ गरी ६ टिमले सहभागिता जनाउने कैलाली जिल्ला खेलकुद विकास समितिका उपाध्यक्ष समेत रहेका प्रतियोगिताका संयोजक बाबुराजा श्रेष्ठले जानकारी दिए ।

प्रतियोगिताको विजेताले ५ लाख तथा उप–विजेता २ लाख नगदसहित ट्रफी र प्रमाणपत्र प्राप्त गर्नेछन् । वुमेन अफ् द सिरीजलाई १० हजार र अन्य चार विधाका उत्कृष्ट खेलाडीलाई ५–५ हजारका दरले पुरष्कार वितरण गरिने छ । प्रतियोगिता आयोजनाका लागि ३८ लाख ६३ हजार खर्च लाग्ने अनुमान गरिएको छ ।