समानुपातिक संसद चयन : रास्वपाका कार्यकर्ता नेतृत्वप्रति आशंकित

राजनीति

- न्युज नेपाल

काठमाडौं । राष्ट्रिय स्वतन्त्र पार्टी कार्यकर्ताले पार्टी नेतृत्वलाई खबरदारी गरेका छन् । समानुपातिकतर्फ प्राप्त गरेको १३ सिटमा सांसद चयन गर्दा विधिपूर्वक गर्नुपर्ने माग गर्दै उनीहरुले खबरदारी गरेका हुन् । समानुपातिकको बन्दसूचीमा रहेका उम्मेदवारबाट १३ जना चयन गर्दा पार्टीको विधि, पद्धति, बन्दसूचीको क्रम संख्या जस्ता मान्यता मिच्न खोजिएको केही कार्यकर्ताहरुको गुनासो छ ।

कार्यकर्ताहरुले बिहीबार पार्टी केन्द्रीय कार्यालय परिसरमा धर्ना पनि दिए । धर्नामा सहभागी पार्टी सुनसरीका अध्यक्ष लालविक्रम थापाले ‘प्राइमरी इलेक्सन’ बाट समानुपातिक पद्धतिका उम्मेदवारको बन्द सूची तय गरेको भन्दै त्यसैअनुसार सांसदहरु चयन हुनुपर्ने माग राखे । डिजिटल डेमोक्रेसीको कुरा गर्ने पार्टी डिजिटलकै अवधारणा अनुसार चलोस् भन्नका लागि आफूहरूले दबाब दिएको थापाको भनाइ छ ।

यस पार्टीका कतिपय समानुपातिक उम्मेदवारहरुले ‘प्राइमरी इलेक्सन’मा पाएको मतअनुसार निर्धारण गरिएको क्रम भंग हुने हो कि भन्ने आशंका गरेका छन् । राष्ट्रिय दलको मान्यता पाएकाहरूलाई तीन दिनभित्र समानुपातिक उम्मेदवारको नाम पठाउन निर्वाचन आयोगले भनेकाे छ । रास्वपाले प्रत्यक्षतर्फ ७ सीट जितेको छ भने समानुपातिकमा १३ सीट प्राप्त गरेको छ ।