कांग्रेस संसदीय दलको नेतामा देउवा निर्वाचित

राजनीति

- न्यूज नेपाल

काठमाडौं । नेपाली कांग्रेस संसदीय दलको नेतामा शेरबहादर देउवा निर्वाचित भएका छन्। बिहान सवा ८ बजेदेखि भएको मतदान परिणाम चाँडै सार्वजनिक भएको हो । महामन्त्री गगनकुमार थापालाई ३९ मतान्तरले पराजित गर्दै देउवा दलको नेतामा निर्वाचित भएका हुन्। देउवाले ६४ मत प्राप्त गरे । थापाले २५ मत प्राप्त गरेका छन् ।

निर्वाचनमा ८९ जना सांसदहरुले मतदान गरेका थिए । निर्वाचनमा सांसद माया राईले अस्पतालबाटै भोट हालेकी थिइन् । निर्वाचन समितिका प्रतिनिधिहरु अस्पतालमै पुगेर उनको मत संकलन गरेका थिए । गगन थापालाई नेता शेखर कोइराला, उपाध्यक्ष धनराज गुरुङ, महामन्त्री विश्वप्रकाश शर्मा, प्रदीप पौडेल लगायतले समर्थन गरेका थिए ।

यसअघि निर्वाचनका लागि मंगलबार दिउँसो मनोनयन दर्ता भएको थियो । संसदीय दलको नेताका लागि पार्टी सभापति देउवा, वरिष्ठ नेता रामचन्द्र पौडेल, महामन्त्री थापा, डा‍. शेखर कोइराला लगायत दावेदारका रुपमा देखिएका थिए । तर सभापति देउवाले र महामन्त्री थापाले मात्रै उम्मेद्वारी दिएका थिए ।